England ngam lotu India-in series la

ODI series match thum khel tur India leh England chuan Pathianni khan an match hnuhnung ber an khel a, mikhual team England-in run ngain India lakah hnehna chang mah se series match hmasa pahnihah India hian hnehna an lo chan tawh tho avangin 2-1 in series an la.

Bat hmasa zawk England hian over 50 chhungin run 321 an siam a, wicket riat an hloh. Mikhual team tan hian opener Jason Roy chuan run 65 siamin bul a ṭan ṭha viau a, Jonny Bairstow (56 runs) leh ball 39 leka run 57 siamtu Ben Stokes ten an thlawp ṭha viau bawk.

Series match hmasa pahnih lama run 300 chuang ve ve siam thei India tan target huphurhawm tak niin lang lo mah se Blues hian over 50-ah run 316 an tlin hram a, wicket kua an hloh. India tan run 90 siamtu Kedar Jadhav chu run siam hnem ber a ni a, Virat Kohli (55 runs) Yuvraj Singh (45 runs) leh Hardik Pandya (56 runs) te an che chhe hran lo. Amaherawhchu run 57 tehmeuh vaw chhuaktu Stokes-a'n India captain Virat Kohli a vawm out a, English bowler hian Jadhav leh Pandya te inkawp chu run 104-ah a tawptir bawk avangin series tawpna inkhelah hian a langsar ber.

India leh England hian January 26 aṭangin Twenty20 series an khel lehnghal ang a, T20 series-ah hian match thum khelin February 1-ah match hnuhnung ber an khel ang.

Chhinchhiah tlak
India leh England-in ODI series match thuma run an siam zat hi 2,090 a ni a, ODI series match thuma run siam hnem ber run 1,892 siamtu Asia XI leh Africa XI ten 2007-a an lo siam tawh chu an lehpel.
Over tinah run 7 zel siam ang an ni a, England leh New Zealand-in 2015-a over tina run 7.15 siam zel ang record an lo siam tawh chu series-a India leh England ODI series-in an phak loh awmchhun chu a ni.
England tan Eden Gardens-a an chak vawi khatna a ni.
Virat Kohli-a'n ODI captain-a nihna innings 17 lekah run 1,000 a tlin thei a, innings 18-a captain nichunga hetiang zat run siam thei South African batsman AB de Villiers-a record a khum.