Folkland Park-ah Blind Football

Vawiin aṭangin Tata Trusts, Indian Blind Foot­ball Federation (IBFF) leh Mizoram Blind Society te chuan a vawi khat nan Folkland Park-ah Blind Football Orientation Camp a buatsaih dawn a, January 26 thleng a awh ang.

Orientation camp-ah hian Shillong aṭangin blind football player pasarih an lo kal a, an zingah hian India International player pahnih an awm. Mizoram blind football team tan chuan thil thar a nih dawn avangin IBFF leh Shillong team hian Mizoram blind football team hi training an pe dawn a ni ber a, exhibition match an khelhpui bawk ang. Mizoram team hi Shillong-ah tournament khel turin IBFF hian an hruaithla dawn bawk a ni.

IBFF hian a vawi khatna atan January 27-29, 2017 chhungin Shillong-ah Blind Football Tournament a buatsaih dawn a, he hunah hian team pangnga - Aizawl, Guwahati, Kolkata, Shillong leh Tura aṭangin an tel dawn a ni. Blind Football hi mi pangain an khel ṭhin a, heng zinga mi pali (outfield player) te hi mitdel niin goalkeeper erawh mitdel lo a ni thung. Keeper bakah hian mitdel ni lo, coach leh goal guide an nei thei a, an ball hman hi a hranpaa siam niin a ri thei a ni.