Mizoram Lockdown (inkharkhip) Ni 110

Chelsea legend Petr Cech-a'n a career tawp a hmanna Arsenal tan khan season li a khel hman a, Premier League bikah match 110 khelhsak hmanin inelna hrang hrangah match 139 a khel. Cech hian Chelsea-a a hlawhtlin angin Arsenal-ah erawh nomawi a chawi tam tawk lo a, FA Cup (1) leh FA Community Shield (2) bak London club-ah hian chhuan tur a nei lo. Chelsea-a technical and performance advisor hna thawk mek Cech hian an ram Czech Republic club Chmel Blsany aṭangin a career a ṭan a, season hnih a khelh hnuah an ram club ṭha Sparta Prague a zawm. 

Sparta Prague-a kum khat a khelh hnuin French club Rennes a zawm a, season hnih hnuah kum 2004 khan Chelsea a zawm. Premier League club-ah hian khawvel hriat hlawh ṭanin a hming a chher hle. Chelsea tan season 11 khelin inelna hrang hrangah match 494-a khelhsak a, Premier League (4), FA Cup (4), League Cup (3), Champions League (1), Europa League leh FA Community Shield (2)-ah te nomawi a chawi a ni. Czech Republic tan match 124 khelhsakin kum 2004 khan UEFA European Championship Team of the Tournament-ah a tel. Czech Footballer of the Year-ah vawi kua ngawt thlan a ni! PFA Team of the Year-ah ṭum hnih a lang a, Best European Goalkeeper-ah vawi li thlan a ni a, UEFA Club Football Awards Best Goalkeeper ṭum thum a dawng a, UEFA Team of the Year-ah vawi khat a lang bawk.