A sang pali zingah Federer
Roger Federer chuan a vawi nga nana Australian Open nomawi chawi a tumna kawngah a ke pen dal zotu a la tawng lo. Swiss star hian nimin tlai khan Mischa Zverev lakah darkar khat leh minute 32 chhung lekin 6-1, 7-5, 6-2 in hnehna a chang; season khat chhunga Grand Slam inelna hmasa berah hian vawi 13 semifinal a lut ta.
Melbourne Park-a inkhelah Federer hian bul a ṭan ṭha takzet a, game hmasa panga a la nghal vek. Grand Slam vawi 17 champion tawh Federer hian world number 50 Zverev service chhuhsak theihna hun vawi 15 a neih zinga vawi ruk ti hlawhtlingin nuamsa takin hnehna a chang.
World number 1 Andy Murray hnehtu Zverev hian Federer hi a chhaih buai phak lo a, double fault nei miah lo khawpin khel ṭha mah se a service vawi khat bak a chhuhlet sak thei lo.
Kum 35-a upa Federer hi season hmasa Wimbledon hnua a inlan lehna hmasa a nih avangin tunṭumah hian seeded 17-na a ni daih a, semifinal-ah chuan Stan Wawrinka nen an inhamchhawn ang. Federer chuan, "Stan hian major title pathum a la tawh a, hmunawl ka siamsak hlek a nih chuan min hneh nghal dawn, chuvangin na takin ka nawr ang," tiin a sawi.
Stan a nghet
Season hmasa Grand Slam hnuhnung ber US Open nomawi chawitu Wawrinka chuan Jo-Wilfried Tsonga chu 7-6 (7-2), 6-4, 6-2 in a hneh a, kum 2014-a a lo hlawlhtlin tawhna hmuna champion leh turin match hnih bak chak a ngai tawh lo.
Swiss tlangval Wawrinka chuan, "Inelna lianah chuan a sang pali zinga tel hi a awlsam lo a, champion phei chu thil harsa tak a ni. Nomawi chawi tur sawi a la hun lo a, a pawimawh ber chu inkhelhah chauh rilru pek a ni," a ti.
Zawhna chhangin kum31-a upa Wawrinka hian player ṭha pali - Federer, Rafael Nadal, Novak Djokovic leh Andy Murray te huangah a la tel ve phak loa a hriat thu inngaitlawm takin a sawi. Stan leh Murray te hian major title pathum ve ve an la tawh.
Nadal vs Raonic
Rafael Nadal-a'n quarterfinal lut turin Gael Monfils lakah fiahna hautak a paltlang. Grand Slam vawi 14 champion tawh Nadal hian France tlangval hi darkar hnih leh minute 56 chhungin 6-3, 6-3, 4-6, 6-4 in a hneh a, vawiin tlai dar 2:00-ah Milos Raonic nen an inhmachhawn ang.
Inkhel dangah seeded pathumna Raonic chuan 7-6 (8-6), 3-6, 6-4, 6-1 in Roberto Bautista Agut a hneh ve thung. Andy Murray leh Novak Djokovic te an tlak tawh avangin Canadian tlangval Raonic hi player la dam zinga seed sang ber a ni tawh.
Kum 30-a upa Nadal hian Grand Slam inelna bikah quarterfinal vawi 30 a khelhna tur a ni a, kum 2015 French Open hnuah tun ṭum hi a sang pariat zinga a inlan lehna hmasa ber a ni thung. Nikum Wimbledon finalist Raonic erawhin tunhnaiah a zawnin vawi thum Australian Open last 16 a paltlang.
Australian Open nomawi vawi khat chawi tawh Nadal chuan, "Raonic hian hmanni lawka khelh zawk tak Brisbane-ah khan min hneh a, tunah hian ranking-ah number 3 a nih avangin inkhel awlsam a ni dawn lo. A bik takin a service a ṭhat em avangin chak tur chuan ka khelh ṭhat a ngai hle ang," tiin a sawi.
Kum 26-a upa Raonic khan last 16-a a khingpui Bautista Agut lakah khan vawi 33 zet aces a siam bakah winners vawi 75 zet a nei bawk a, a ball vuak a na hle tih a chiangin semifinal thlen chhoh pui tham a ni. Hetihlai hian unforced errors vawi 55 teh meuh a neih erawh Nadal lakah chuan a chhunzawm chi loh ang - Nadal-a'n Monfils lakah vawi hnih chiah aces siam mah se unforced errors ṭum 27 chiah a nei.