Mizoram an chak zel

31st Captain NM Gupta Trophy Football Tournament-ah Mizo­ramin an match hmasa berah Army Recruitment Corps Centre, Bangalore chu 4-0 in an sawp a, nimin khan Assam Regimental Centre (ARC), Shillong 1-0 in an hneh leh bawk.

Satindra Mohan Dev Stadium, Silchar-a inkhelah ARC-in bul an ṭan ṭha zawk a, Mizoramin hun chanve hma lamah an ngam lo. Second half-ah Mizoram tan Lalrammawia leh Lalchhuanawma te an lut a, Lalsangzuala Hmar hote goal nawr a na sawt bawk.

Minute nga chiah khelh tur a awm tawh tihin Mizoram tan Lalbiakhlua'n goal awm chhun a khung a, Mizoram Police forward hian match hmasa berah goal hnih khung a tawh bawk.

Mizoram manager Peter Vanlalzawma chuan, "ARC hian match hmasa berah goal awm loin Silchar club Arunachal SS an inhnehtawkpui a, team ṭha taka kan ngaih loh avangin player pawimawh kan awltir a, kan tihsual phah ṭep a ni. Inkhel pawimawh takah kan chak avangin kan lawm hle a ni," tiin an result avanga lawm thu a sawi.

Peter-a chuan sawi chhun­zawmin, "Mizoram inkhel en tur hian Mizo mipui ṭhahnem tak an pungkhawm a, min ṭawiawmna avangin an chungah kan lawm takzet a ni," tiin ṭantu an neih ṭhat avanga a lawmthu Vanglaini palai a hrilh.

Santosh Trophy khel tura inpuahchah Mizoram hi Group B-ah hmahruaitu an ni a, an hnuai chiahah Silchar club Arunachal SS an awm. NM Gupta football-ah hian team 10 telin group hnihah ṭhendarh a ni a, a sang pahnihin semifinal an lut dawn.

Mizoram hian Assam Rifles, Shillong (Jan 27) leh Arunachal SS (Jan 30) te an la hmachhawn ang.

Team Dinhmun
# Team Dinhmun Pld W D L GF GA GD Pts
1 Mizoram 2 2 0 0 5 0 5 6
2 Arunachal SS 2 1 1 0 1 0 1 4
3 ARC, Shillong 2 0 1 1 0 1 -1 1
4 Assam Rifles, Shillong 2 0 1 1 0 1 -1 1
5 ASC, Bangalore 1 0 0 1 0 4 -4 0