CoCo-i a hmuhnawm zel

Australian Open khelh mekah world number 1 leh champion lai ni bawk Angelique Kerber hnehtu CoCo Vandeweghe a hmuhnawm zel. American nula hian nimin khan French Open champion Garbine Muguruza chu 6-4, 6-0 a hnehin semifinal a lut a, a thlen chin apiang hi Grand Slam inelna bikah chuan a tan record thar a ni zel tawh.

Melbourne Park-a inkhelah Vandeweghe hian darkar khat leh minute 23 chhungin harsatna a tawk lo, a service a hloh miah loh laiin a khingpui service chhuhsak theihna hun ṭha a neih vawi 13 aṭangin ṭum thum chu a chhawr ṭangkai thei.

Kum 25-a upa Vandeweghe chuan, "Hetiang boruak sang hi ka la tawn loh avangin a chang chuan ka zam deuh. A ṭha thei ang berin khelh chhunzawm zel ka tum, set khatna kha a harsat viau rualin set hnihna kha chu a awlsam tawh a, beiseina nen ka kal zel ang," tiin a sawi.

Nimin inkhel dangah Venus Williams chuan kum 14 hnua a vawi khat nan Australian Open semifinal lut turin Anastasia Pavlyuchenkova chu 6-4, 7-6 (7-3) in a hneh ve bawk. Ningani zing dar 8:0-ah Vandeweghe nen final luh inchuhin an inkhel leh ang.

Kum 36-a upa Venus hian Grand Slam nomawi pasarih chawi tawh mah se Australian Open-ah hian a la hlawhtling ngai lo, kum 2003 khan final lutin a nau Serena Williams lakah a chak lo a ni.

Kumin Australian Open-ah hian Venus hi singles player zinga upa ber a ni a, final a lut thei a nih chuan kum 1994 Wimbledon final kheltu Martina Navratilova khum­in Grand Slam inelna final khel thei upa ber a ni ang.

Thawhṭanni inkhelah British number 1 Johanna Konta chuan Ekaterina Makarova chu 6-1, 6-4 a hnehin set hloh miah loin quarterfinal a lut a, semifinal-ah world number 2 Serena Williams nen an inhmachhawn leh dawn.

Australian Open vawi ruk champion tawh Serena hian Strycova chu 7-5, 6-4 in a hneh ve thung a, Konta hnehin semifinal a lut a nih chuan major tournament-ah vawi 48 semifinal a luhna tur chiah a ni ang.

Grand Slam vawi 22 champion tawh Serena hian nomawi a chawi thei a nih chuan Kerber khumin world number 1 a ni leh thei dawn a, Open Era bika player hlawhtling bera ngaih Steffi Graf chu Grand Slam nomawi chawi hnem lamah a khum chiah dawn bawk.