AFC Asian Cup 2019 ; India tan kalkawng a awlsam dawn
Tun hnaia FIFA ranking lama hmasawn India tan AFC Asian Cup 2019 khel turin kalkawng a awlsam dawn - Thawhṭanni khan UAE-a inelna neih tura tel tur zawnna third qualification round draw neih a ni a, India hi Group A-ah Kyrgyzstan, Myanmar leh Macau te nen dah ho an ni.
AFC Asian Cup 2019 third qualification round-ah hian team 24 awmin group parukah ṭhen an ni a, group khatah team pali zel awmin home & away-in an inkhel kual vek dawn a ni. Group tina hmahruaitu leh pahnihna te hi Asian Cup khel tur hian an tling ang a, second qualification round aṭanga tling tawh team 12 te nen inelna an neiho ang.
India hi FIFA ranking hnuhnung berah 129-na niin an group a awm zinga huphurhawm ber tur nia ngaih chu Kyrgyzstan niin 124-na an ni a, Myanmar (159) leh Macau (184) lakah India tan harsatna awm tam lo tura ngaih a ni.
Tun hnai lawka kum khat dang cham chhunzawm tura contract thar ziaktu India coach Stephen Constantine chuan, "Asian Cup khel tura kan beiseina chhi nung tur chuan theihtawp kan chhuah chhunzawm zel a ngai dawn a ni," a ti.
English coach chuan players thlan dan tur chungchang sawi nghalin, "I League khelh ṭan a nih tawh avangin India tana khel tur zawnna atan kan hmang dawn a, player che ṭha apiang koh an ni ang. March-ah camp nei turin players 30 kan ko ang a, tun hmaa an lo chet ṭhat tawhnain awmzia a nei lo ang," tiin India tana khel chiang sa an awm loh thu a sawi.
India hian March 28-ah Mynamar lenchilhin an zinkawng an ṭan ang a, June 13-ah Kyrgyzstan chu mahni khelmuala an match hmasa ber ni turin an mikhual ang. September 5-ah Macau khel turin an zin chhuak leh ang a, October 10-ah an mikhual thung ang. Stephen Constantine-a enkawl team hian Myanmar chu November 14-ah an mikhual chhunzawm ang a, March 27-ah an match hnuhnung ber khelin Kyrgyzstan an lenchilh ang.
Asian Cup-a India inlan hnuhnung ber chu kum 2011 khan a ni a, kum 2008-a AFC Challenge Cup champion an nih vanga khel an ni. Qualification round pangngai paltlanga an khelh hnuhnun ber erawh kum 1984 daih tawh kha a ni a, kum 1964 khan final lo khel tawhin Asian Cup-a India thlen san ber ṭum a la ni reng.
Group inṬhen dan
Group A : Kyrgyzstan, India, Myanmar, Macau
Group B : North Korea, Hong Kong, Lebanon, Malaysia
Group C : Jordan, Vietnam, Afghanistan, Cambodia
Group D : Oman, Palestine, Maldives, Bhutan
Group E : Bahrain, Turkmenistan, Chinese Taipei, Singapore
Group F : Philippines, Tajikistan, Yemen, Nepal
* Group khat aṭangin team pahnih zel an tling ang