Syed Modi International lamah Sindhu

Tunkar chhung hian Syed Modi Grand Prix Gold chu Lucknow-ah khelh a ni dawn a, Indian star P. V. Sindhu a inlan dawn laiin Saina Nehwal erawh chawlh hahdam a duh avangin he badminton inelna aṭang hian a inhnukdawk thung.

Rio Olympic silver medalist Sindhu hian Janaury thla tir khan Chennai Smashers chu Premier badminton League (PBL) title a lakpui a, he mi hnuah tun ṭum hi inelna a hmachhawn lehna tur hmasa ber tur a ni, seeded pakhatna Sindhu hian a match hmasa berah Anura Prabhudesai a hmachhawn ang.

Pathianni lawka Malaysia Masters Grand Prix Gold title latu Saina erawhin a khup dam tawh mah se chawlh a la mamawh thu a sawi. Mipa singles lama Kidambi Srikanth a inlan thei thung ang.

Kum 26-a upa Saina chuan, "PBL hnuah kar thum chhung rim takin ka khel leh tawh a, ka khup hliam chu dam tawh mah se Malaysia open-ah khan ka theihna zawng zawng ka hman avangin tunah chuan chawlh ka mamawh rih," tiin a sawi.