Formula 1 chief executive Ecclestone an thlak

Bernie Ecclestone chu Formula One chief executive a nihna aṭanga paihthlak a ni a, a thuneihna chu Chase Carey kutah hlan chhawn a ni thung.

American mass media com­pany lian Liberty Media chuan pound tluklehdingawn 6.4 zetin Formula 1 infiamna neitu nihna an chang pumhlum tawh a, kum 40 chhung he infiamna lo enkawl tawhtu British pachal Ecclestone chu chairman atan an la dah zui tho a, adviser a ni bawk ang - chief executive thar hi 21st Century Fox vice chairmain nihna lo chelh tawhtu Carey a ni.

Carey chuan, "CEO ka ni tur hi ka lawm, Formula 1 infiamna hian fans a ngah a, khawvel hmun hrang hrangah ngainatu an tam hle tih ka hria. Bernie hna lo thawh tawhte ka zah em em a, a thawhrim leh taimakna hi hetiang dinhmun kan thlen theihna chhan hi a ni. Formula 1-ah chuan mi pawimawh a ni kumkhua tawh ang," a ti.

Liberty hian Mercedes team boss hlui Ross Brawn chu Formula 1 huangah an hruai kir leh bawk. Ferrari technical director pawh lo ni tawh Brawn hi Liberty-ah consultant a ni a, intlansiak khawvelah a mikhual lo. F1-a a lo kir leh takah chuan sporting leh technical enkawltu a ni ang.

Kum 62-a upa Brawn hian Formula 1 chanchina driver hlawhtling ber Michael Schumacher kha Benetton leh Ferrari-ah a kaihruai a, Jenson Button-a world champion a nih theih nana thluak bur a ni bawk. Mercedes-a a kal hnuah pawh mi pawimawh a ni a, Lewis Hamilton leh Nico Rosberg te an par vul theih nana ngaihtuahna sengtu pawimawh a ni.

Kum 86-a upa Ecclestone chuan, "He infiamna ka hmangaih tak tana kum 40 chuang zet ka thawk thei hi ka lawm a, nakin hun lo kal zel tur thlirin Formula 1 tan chuan Liberty hi a hlu a, hmasawnna tam tak hmuh theih phah pawh ka beisei. Ka thawhpui leh hmun hrana hrana min ṭawiawm ṭhintute zawng zawng chungah lawmthu ka sawi a, Chase pawhin ṭha taka hna a thawh theih nan duhsakna ka hlan," tiin a sawi.

British pa hausa zinga lang phak Ecclestone hian kum 1970 bawr vel aṭang khan Formula 1 inelna hi luhchilhin Brabham a lei a, a team thar hi F1 inelnaah a vawi khat nan hnehna a chanpui mai bakah world title vawi hnih a lak pui - kum 1983 khan a vawi khat nan turbo engine chu a hmang bawk.

Team neitu a nih bakah Television a phochhuah leh sumdawna lama thuneitu a ni chho a, Formula 1 chu Olympic leh FIFA World Cup te tih lohah chuan khawvela infiamna ngaihhlut leh enhlawh ber pakhatah a chantir.

Kum 1990 hnu lamah phei chuan F1 commercial rights neitu a ni tawh a, Liberty Media-in car inelna lian an neih pumhlum hma kha chuan CEO a ni - US company lian an rawn lan hnuah erawh thlak a ni.