Senegal leh Tunisia an tlang

Africa Cup of Nations khelh mekah quarterfinal lut thei chin a chiang chho zel, Thawhṭanni zan khan Group B chuan an league round khel zoin Senegal leh Tunisia te an tlang.

Gabon-a inkhelah group hmahruaitu Senegal chuan Papakouly Diop leh Moussa Sow te goal khung hmangin Algeria 2-2 in an inhnehtawk pui a, match thum khelh aṭanga point sarih hmuin a chung berah an awm. Algeria tan hian Leicester City striker Islam Slimani chuan goal hnih khung ve mah se awmzia a nei phak lo.

Group B inkhel dangah Tunisia chuan Naim Sliti, Youssef Msakni, Taha Khenissi leh Wahbi Khazri te goal khat ṭheuh khung hmangin table mawngphah a awm Zimbabwe 4-2 in an hneh ve bawk.

Inrinniah quarterfinal khelh zui tur niin kum 2002 runner up Senegal leh Group A hmahruaitu Cameroon an inkhel ang a, 2004 champion Tunisia hian Burkina Faso an hmachhawn ve leh bawk ang.