Anfield-ah Atalanta; Greece-ah City

Zanin dar 1:30-ah Liverpool chuan Champions League match khel turin Atalanta an mikhual dawn a, Jurgen Klopp-a nauten hnehna an chan chuan last 16 an lut chiang ang. 

Group D inkhel dangah Ajax chuan zan dar 1:30-ah vek chak la nei lo Midtjylland an mikhual dawn a, Dutch club hian last 16 luh an tum chuan zaninah chak loh a thiang tawh dawn lo. 

Premier League club langsar Manchester City chu zanin dar 11:25-ah an inlan ve dawn bawk a, Greece-ah Olympiakos an lenchilh dawn - City tan last 16 lut turin draw result a tawk ang. 

City awmna group C inkhel dangah Marseille chuan zan dar 1:30-ah Porto an mikhual bawk ang. Portuguese club tan last 16 lut turin zanin inkhela chak a pawimawh dawn. 

Liverpool-in player inhliam an ngahzia hrilh nawn kan ngai lo a, mahse hliam vanga talbuai tura ngaih chi an ni lo - a awih lo tan 3-0 a an sawp hlim Leicester City zawh theih an ni!

Reds hian Covid-19 vanga Foxes laka an chhawr theih loh Mohamed Salah chu an chhawr thei leh tawhin a rinawm a, captain Jordan Henderson leh Thiago Alcantara-ten dam lam pan tawh mah se Klopp-a'n 5-0 a an sawp tawh hnu team lakah an dam chian loh chuan 'risk' a la duh lo ang. 

Trent Alexander-Arnold, Joe Gomez, Virgil van Dijk leh Alex Oxlade-Chamberlain-te chu inhliam inlan thei lo tur chiang an ni a, Naby Keita leh Xherdan Shaqiri-ten an damdawi in lun tawh sa an tih lun belh bawk. 

Atalanta-in chhuanlam tur an nei ve tho a, midfielder Ruslan Malinovskiy leh right back Fabio Depaoli-te chu an inlan thei dawn lo a, an ṭhat dan berin Anfield an pan dawn lo. 

Liverpool-in khualmualah an sawp tawh miau avangin Atalanta an zuam ang tih a chiang a, chutihrual chuan Italian club hi zuam sual theih an ni tih erawh theihnghilh loh a ṭha. 

Atalanta hi Reds laka an mualpho hnuin an insiamṭha thei lo - Inter Milan chu 1-1 in an inhnehtawkpui a, Spezia chu goal khung lo vekin an inhnehtawkpui bawk. 

Mahse, international break-ah Remo Freuler a hmuhnawm a, Swiss midfielder hi European football-a a phu anga fak hlawh tawk lo ber pawl player niin an sawi hial - zaninah danglamna thlen a tum ang. 

Tlarhmaah hian tun season-a goal nga khung tawh ṭhah Luis Muriel, Alejandro Gomez leh Duvan Zapata an awm bawk a, Foxes laka talchhuak Reds tlarhnung phuahchawpin an dang thei ang em, tih chu zawhna awm thei tak a ni. 

Pathianni zanah Liverpool-in match hautak khelin Foxes an mikhual a, zaninah Atalanta mikhual zui a ngai dawn - Premier League lamin fixture an duan danah a lawm lo a, inkhel en tura pechhuaktu broadcaster lam a dem. 

Klopp chuan, "A harsat thu min hrilh zel a, a harsa ber zawk erawh player tan a ni. Thuneitute hian fixture tidanglam tura an mamawh chu dawhkan kilho a, sawiho a ni mai. Sky leh BT (official broadcaster)-te hian sawiho an mamawh a, hetianga kan inkhelh reng chuan player 11 lekin season kan khar mai ang," a ti!

German coach chuan broadcasting deal chu an remtihna anga kalpui a nih thu sawi chungchangah, "Contract chungchang hi ka beng hriatah an sawi leh a nih chaun ka lawm lo khawp ang. Contract ziah a nih lai khan tumahin Covid-19 nena kal dun turin an ti bik lo. Mahse, khawvel a danglam a, hmai tuam a ngai a, in tuam a, kan insiamrem mai alawm.

"Substitution pawh hma takah kan siam ngam lo a, player pakua nen game tihtawp kan hlauh vang a ni," a ti a, Foxes lakah khan Reds hian player pahnih chu minute 89-naah an luhtir - zaninah Liverpool player inhliam belh an awm a nih ngat chuan Klopp-a bengchheng lehzual khawp ang. 

Manchester City-in an beisei angin season an hmang thei lo a, coach Pep Guardiola-a'n contract thar a ziah zawh hlimah pawh point thum nen an lawmsak thei lo - match hnuhnung berah Tottenham Hotspur chu 2-0 in an ngam lo. 

City hian Spurs laka an tlawm hmain Liverpool chu 1-1 in an inhnehtawkpui tawh bawk a, league table-ah 13-na an nih mek avangin an dinhmun a chhia tih phat rual a ni lo - Champions League-ah Premier League lama an mawi lohna tuam mawi an tum ang. 

Pep-a naute hian Olympiakos hi Etihad Stadium-ah 3-0 in an sawp tawh a, khualmuala khel tur an nih avangin match hmasa anga awlsam tura ngaih erawh a fuh tawk lo ang - fimkhur a ngai dawn. 

Olympiakos hian an match hnu-hnung berah Panathinaikos chu 1-0 in an hneh a, Super League Greece table chung berah an awm mek. City hian hliam vangin Nathan Ake, Fernandinho leh Sergio Aguero an chhawr thei dawn lo chiang a, Benjamin Mendy chuan training a zawm leh tawh thung.