Premier League-ah entu an awm dawn!

Khawvela football league ngaihven hlawh ber tih ngam Premier League-ah entu an awm leh thei tawh dawn a, hetihrual hian a tam berah mi 4,000 aia tam punkhawm erawh a theih dawn chuang loh.

England-ah inkhar-khip (lockdown) kalpui mek a ni a, December 2-ah inkharkhip hun hman lai hi a tawp tawh dawn. UK sorkar chuan inkharkhip zawh ruala stadium-a fans an awm theih tawh dan tur an ngaihtuah a, mi 4,000 thleng pungkhawm thei turin thutlukna an siam ta a ni. 

Ruahman ang chuan England ram chhunga hmunte chu Covid-19 hri tam dan a zirin ṭhen hran a ni dawn a, tier 1, tier 2 tier 3-ah ṭhen an ni - tier 1 hi hri hlauhawm vak tawh lohna hmuna ngaih a ni a, heng khuaah te chuan outdoor games-ah fans 4,000 thleng punkhawm phal a ni ang. 

Tier 2-ah fans 2,000 thleng an punkhawm phal a ni ang a, tier 3-ah fans punkhawm phal a la ni dawn lo thung - Premier League club-te pawh an awmna 'tier' a zirin an vanneiin an vanduai thei dawn tihna a ni. 

Indoor game-te chuan fans 1,000 aia tam an neih a thiang lo a, hei hi tier 1 leh tier 2-ah a hman dan tur a inang ve ve. Hetihrual hian outdoor games-ah pawh fans 4,000 thleng a ngei ngeiin a theih tihna a ni lo. 

Stadium-a leng zat 50% aia tam chu outdoor leh indoor-ah pawh punkhawm phal a ni lo a, chumi awmzia chu inkhelhna stadium-ah khan mi 2,000 chiah an leng a nih chuan mi 1,000 aia tam punkhawm phal a ni chuang lo tihna a ni. 

Sorkar chuan Novem-ber 5 aṭanga chawl tawh grassroots sport leh amateur sport pawh kalpui theih leh tawh turin an ti a, lockdown chhung zawng hian professional inelna te erawh kalpui reng a ni thung. 

Tier 1, 2 leh 3-a ṭhente hi UK sorkar chuan a la puangzar hrih lo a, Ninganiah puangzar tura ngaih a ni. UK prime minister Boris Johnson chuan, "Tier awm dan tur hi Ninganiah chuan kan puanzar theih ka beisei a ni," tiin a sawi,. 

Premier League chuan thuchhuah siamin fan-te stadium-a an kir leh thei tur chu an lawm thu an sawi a, hetihrual hian club-ten ticket hralhna tur awm loh avanga sum tam tak an chan chu an hloh chhunzawm lohna turin, tun aia tam zawk fans an kir theihna turin sorkar nen thawhdun theih an beisei thu an sawi tel bawk.