Mizorama cricket thiam ber Ramhlun Venglai

Central YMA leh Cricket Association of Mizoram buatsaih 11th Inter Branch YMA Cricket Tournament final-ah Ramhlun Venglai chuan Durtlang chu 46 runs-in an hneh a, Central YMA Cricket inelnaa vawi nga champion thei hmasa ber an ni.

Final hi nimin khan Suaka Cricket Ground, Sihhmuiah khelh a ni a, Ramhlun Venglai hian bat hmasain 120 runs an siam a, Durtlang hian 74 runs chauhin an chhanglet. RVL hi kum 2006 leh 2008 khan an champion tawh a, inelna hnuhnung pathumah a zawnin an champion leh bawk.

Ramhlun Venglai champion puitu bowler pawimawh F. Lalruatfela chu player of the tournament atan thlan a nih bakah final-ah man of the match-a thlan a ni a, best bowler a ni bawk. RVL batsman Vanlalhruaitluanga chu best batsman-ah thlan a ni bawk.

RVL an ṭha
Tun ṭum inelnaa hian Durtlang hi ṭhumvawrah an chak vek a, an vawm hmasa zel - final-ah pawh a danglam lo. RVL tan Vanlalhruaitluanga (30) leh C. Vanlalhruaia (12) ten bul an ṭan chhe lo a, wicket hmasa ber an hloh hmain 36 runs an siam tawh.

Champion lai tan che ṭha fal awm lo mah se Johan Lalbiakkima (16), F Vanlalmuanzuala (11) leh F. Lalruatfela (19*) ten run tlem azawng belh zelin over 20-ah wicket ruk hlohin 120 runs an siam.

Durtlangin batsman ṭha Lalhruaizela, Zothanzuala, Lalhriatrenga leh K. Vanlalruata te an kawl avangin beiseina sang tak an nei a, champion tur a chiang lo. Mahse, RVL bowler B. Laltlanmawia'n ball hmasa berah Hruaizela a vawm hlum nghal a, hemi over-ah vek hian a unaupa Hriatrenga a vawm hlum leh bawk.

Over hmasa ber thil thleng avangin RVL dinhmun a ṭha a, Zothanzuala (1) leh Ruata (10) ten pressure sangah danglamna an thlen thei lo. RVL bowler F. Lalruatfela'n wicket li lain 23 runs chauh a pe a, Durtlang captain H. Zothanchhunga'n ball 14 leka 26 runs a siamte chu mualpho lutuk tur hliah khuhna chauh a ni.

Durtlang hian over 14.3-ah 74 runs chauh an siam a, Ramhlun Venglai 46 runs-in an chak.

5 Star RVL
Ramhlun Venglai hian champion nomawi humhim turin harsatna lian tham an tawk lo a, match hmasa bera Govt Complex an hmachhawn ṭuma wicket hnih chauha an chak chu an chetsual teuh ber a ni.

RVL hian Govt Complex zawhah Zemabawk, Hunthar leh Durtlang te hmachhawnin an theihna tak an lantir a, an phu ang ngeiin an champion. Central YMA cricket inelna hi vawi 11 a awm tawh a, RVL hian final vawi riat lutin vawi nga an champion a, Mizorama cricket thiam ber an ni.

Ramhlun Venglai coach Vanlalzuata chuan, "Bat hmasak kha kan duh a, Durtlangin vawm hmasak an thlang kha kan lawm. Kan target chu 130+ runs siam a ni a, 120 kha chu kan lawmna a ni lo chungin Sihhmuiah chuan target ṭha tak a ni tih kan hria. Over hmasa bera Hriatrenga te unau kan vawm hlum thei kha danglamna chu a ni. Vawi nga kan champion thei hi kan lawm takzet," tiin Vanglaini a hrilh.

Cricket inelnaa record nei ṭha Ramhlun Venglai hian YMA information kaltlangin, "Kan champion a nih pawhin champion dan kan thiam tur a ni a, midang rilru kan ti na tur a ni lo. Kan vanduai ta zawk a nih pawhin kan tuar thiam tur a ni," tiin infiammi rilru puin Sihhmui an pan a, a rah chhuah chu hlawhtlinna a ni.

Durtlang veteran player K. Vanlalruata chuan, "Theihtawp kan chhuah a, kan thlen chinah kan lawm. Final-ah erawh team ṭha zawk Ramhlun Venglai an chak a, kan la tluk lo deuh a ni. Kan lawmpui e," tiin a sawi ve bawk.

CYMA Cricket Final
Ramhlun Venglai bt Durtlang
Ṭhumvawrah Durtlang an chak, vawm hmasak an thlang
Ramhlun Venglai 46 runs-in an chak
MoM: F. Lalruatfela, Ramhlun Venglai

Ramhlun Venglai 120/6 (20.0)
Vanlalhruaitluanga 30 (39)
F. Lalruatfela 19* (12)
Johan Lalbiakkima 16 (26)
C. Vanlalhruaia 12 (18)

F. Lalruatfela 23/4
Lalrintluanga Vanchhawng 6/3
B. Laltlanmawia 5/2
Lalrinfela Zadeng 16/1

Durtlang 74/10 (14.3)
H. Zothanchhunga 26 (14)
Duhsaka Aineh 18 (31)
Vanlalruata Khawlhring 10 (7)
Henry 7 (11)

Lalhruaizela 13/1
Vanlalruata Khawlhring 16/1
H. Zothanchhunga 17/1
Zosangkima 17/1