Odisha an chak lo nghal

Indian Super League-ah Mizo tamna Odisha FC chuan Thawhṭanni khan an match hmasa ber an khel a, Hyderabad FC hmachhawnin an chak lo nghal. 

Hyderabad FC tan hian Aridane Santana chuan inkhela goal awmchhun hi a khung a, minute 35-naah penalty aṭangin a chhuih lut.

Newcastle United defender hlui Steven Taylor chuan Hyderabad tana Halicharan Narzary-a shot chu a kutin a dang a, penalty a chawi - Spanish striker Santana chuan goal-ah a chantir zui. 

Odisha Mizo player langsar zingah Jerry Mawihmingthanga chu hliam vangin a inlan thei lo a, Samuel Lalmuanpuia, Daniel Lalhlimpuia leh S. Lalhrezuala-te chu bench-ah dah an ni. 

Zemabawk North tlangval Samuela hi minute 66-naah bench aṭanga luhtir a ni a, Shillong Lajong captain hlui hian danglamna erawh a thlen thei bik lo. 

Samuel-a chuan, "Hyderabad laka kan khelh dan anga kan khel chhunzawm a nih chuan playoff khelh beisei phak chi a ni lo a, kan beisei ang result kan hlawh chhuak lo. 

"Hetihrual hian player inhliam leh quarantine ngai an la awm nual avangin kan ṭhat dan berin kan la khel lo a, kan dam kim chuan a dan a dang ve deuh ang," tiin Vanglaini a hrilh. 

Hyderabad lamah winger Laldanmawia Ralte leh forward Lalawmpuia chu bench-ah dah an ni a, Sialhawk Express tia hming lem an pek Danmawia hi bench aṭangin minute 77-naah a lut. 

Zanin Indian Super League-ah inkhel pakhat a awm dawn a, Mizo awm lohna FC Goa leh Hmingthanmawia (Valpuia) khelhna Mumbai City FC an intawng ang. 

FC Goa hian an match hmasa berah Bengaluru chu 2-0 a an hnufual hnuin 2-2 in an inhnehtawkpui a, Mumbai City hian rin loh takin NorthEast United an ngam lo thung. 

Mumbai coach Sergio Lobera hi FC Goa neitute nena inhmuthiam lo chunga Goan club chhuahsantu kha a ni a, Gaur (FC Goa sawina) player a chhawm nual bawk avangin inkhel boruak a sang ang.