Suns leh Miami dinhmun a ṭha hret

Phoenix Suns chuan Western Conference semifinal paltlang turin match khat chauh an mamawh ta, nimin zing khan Dallas Mavericks 110-80 a hnehin best of seven series-ah 3-2 in hma an hruai.

Team pahnih an inkhel tawk hle, half time an hman zawh hnu lawkah Mavericks hi 49-48 chauhin an hniam zawk, a zawna a vawi thum nan chak an beiseina pawh a sang hman hle, mahse Suns lamin thil tum dang an la nei ve thung.

Hun pawimawhah Devin Booker a inlar, point 28 a neih zinga 12 chu quarter thumna chhunga a neih niin, hemi quarter bikah hian Suns hi 33-14 in an chungnung. Quarter hnuhnung berah chungnung zui lehin a tawpah chuan an sang fal hle.

Eastern Conference semifinal lamah Miami Heat chuan Philadelphia 76ers 120-85 in an hneh a, series-ah 3-2 in hma an hruai ve bawk. Zirtawpni zingah game 6 an khel dawn, an chak leh a nih chuan conference final an lut ang.

NBA-ah hian Eastern leh Western Conference a awm, conference pahnih champion hian NBA Finals an la khel leh dawn a ni.

NBA Playoff
Western Conference Semifinal
Game 1: Phoenix Suns 121 - 114 Dallas Mavericks
Game 2: Phoenix Suns 129 - 109 Dallas Mavericks
Game 3: Dallas Mavericks 103 - 94 Phoenix Suns
Game 4: Dallas Mavericks 111 - 101 Phoenix Suns
Game 5: Phoenix Suns 110 - 80 Dallas Mavericks
May 13, Zirtawpni
Game 6: Dallas Mavericks 07:00 AM Phoenix Suns
(Suns hian series-ah 3-2 in hma an hruai mek)

Eastern Conference Semifinal
Game 1: Miami Heat 106 - 92 Philadelphia 76ers
Game 2: Miami Heat 119 - 103 Philadelphia 76ers
Game 3: Philadelphia 76ers 99 - 79 Miami Heat
Game 4: Philadelphia 76ers 116 - 108 Miami Heat
Game 5: Miami Heat 120 - 85 Philadelphia 76ers
May 13, Zirtawpni
Game 6: Philadelphia 76ers 04:30 AM Miami Heat
(Miami hian series-ah 3-2 in hma an hruai)
Note: Inelna hi best of seven series hmanga khelh a ni, tlang turin vawi li chak a ngai.