Arsenal leh Spurs an bûk dawn

"Point thum hmuh tum chungin Arsenal kan mikhual ang," tiin Tottenham Hotspur manager Antonio Conte chuan North London Derby an khelh tur chungchang a sawi, zanin dar 12:15 hian an hmelma Gunners hi an lo mikhual dawn.

Premier League champion tuma in um an ni lo, mahse Champions League khelh tum team pahnih tan zanin aia match pawimawh hi a tam bik chuang lo ang. Arsenal hian hnehna an chan chuan UCL ticket an nei fel ang.

Conte naute tan chak loh a thiang lo, an hmelma hi an hneh thei a nih erawh chuan point khat chauhin an hniam dawn - khelh hmabak dang pahnih a la awm dawn avangin beiseina a sang thei ang.

Rilru inbeihna
Antonio Conte-a'n Tottenham a zawm hnuah thil hrang hrang a sawi fo a, a thil tum erawh a ngai reng - chu chu season thara Champions League khelh phak a ni, European football an khel phak lo a nih chuan player ṭha chelh a harsa dawn tih a hria.

Tawnhriat nei ṭha Conte chuan, "Arteta hian kum hnih leh a chanve chhung Arsenal a enkawl tawh, hna a thawk ṭha takzet. Hmasawnna tam tak hmuh tur a awm, team inkhairual ṭha tak an ni," tiin an khingpui tur team chu a fak, a rilru tak tak a sawi kher lo ang.

Italian manager chuan sawi zawmin, "Season kan hman dan chhut chuan, tuna kan dinhmun pawh hi a chhe lo. Amaherawhchu, kan tum ram kan la thleng lo, chuvangin zaninah hian point thum hmuh tumin mikhual kan thleng ang," a ti.

Kal dan ngai
Tun hnaiah Arsenal hian a zawnin match li chhung hnehna an chang, match hnuhnung bera Leeds United an hneh hnuah Arteta chuan, "Tuna kan boruak pangngai ang tho hian Tottenham hmachhawn ka duh.

"Ka naute hian nuam ti takin khel se, chu chu ka duh ber," tiin a lo sawi tawh. Zanin erawh match dang nen chuan a boruak a inang dawn lo, player khaikhinin naupang leh tawnhriat nei tlem zawk an ni a, an tan fiahna a ni ang.

Europa League khel tur chuan an tling chiang tawh a, an la duhthawk si lo. An hmelma leh elpui Tottenham hneh chung ngeia UCL ticket neih hi Arsenal duhthusam a ni dawn a, an ti thei a nih ngat chuan UCL khelh an phu tawk tihna a ni bawk ang.

Kane vs Nketiah!
Harry Kane leh Eddie Nketiah te hi khaikhin chi an ni lo, an sulhnu en pawhin an inthlau lutuk. Amaherawhchu, tunlai boruak thlir chuan, tun hnaia team tana an ṭangkai dan chhut ila - Nketiah hi dah hniam theih a ni bik lo.

Pierre-Emerick Aubameyang a chhuak a, rinrawl chu Alexandre Lacazette a ni. Laca hian goal a khung thei lo, a damlo zui bawk. Loh theih lohin Nketiah a khelh a ngai, a khelh chinah a hna a tlin - Leeds United laka goal hnih khung hlim a ni.

Kane ṭhatzia inhrilh nawn a ngai lo. England captain hian season kal laiah goal 13 a khung tawh, season hmasa (23 goals) nena khaikhin chuan a tlem. Mahse, Arsenal player goal khung hnem ber aiin a la khung hnem tho!

A sir inbeihna
Son Heung-min-a'n league goal 20 a khung tawh, penalty chhiar tel lo chuan tun season EPL goal khung hnem ber a ni hial. South Korea international hi Kane nen an inkawp rem, anni pahnih aia in man hi club dang player zingah an awm bik lo.

Mual sir lama Son tlan chakna hi Spurs hmanraw hlauhawm a ni, ani dang turin Arteta-a'n Takehiro Tomiyasu a dah a rinawm. Japan international hian a hliam dam hnuah ngai a awh leh tawh, mual sir leham lehlama khel thei a ni - Asian player pahnih an inhmachhawn a rinawm.

Arteta-a'n, "A dinhmun a ṭha," tiin Bukayo Saka chungchang a sawi. English rawlthar hi Arsenal player pawimawh berte zinga mi a ni a, goal a khung theih bakah assist a nei thei, season tira an intawn ṭum khan goal a khung bakah assist a nei bawk; en bik hlawh zinga mi a ni ang.

Khelh Hmabak
Arsenal
Zanin Tottenham (A)
May 16 Newcastle United (A)
May 22 Everton (H)

Tottenham
Zanin Arsenal (H)
May 15 Burnley
May 22 Norwich City

• Arsenal-in Tottenham an hneh chuan UCL khel turin an tling.
• Arsenal leh Spurs hi an inhneh-tawk chuan Gunners tan UCL khel turin match hnih aṭangin point thum hmuh a la ngai ang.
• Arsenal hi an chak lo a nih erawh chuan Gunners tan match hnuhnung pahniha chak ve ve a ṭul ang.
• Tottenaham hian Gunners lakah point hmu pawh ni se UCL khel tur chuan Mikael Arteta hote hi an chetsual a ngai thung.