Gokulam ngamtu Romawia vangin 'I League final'

Gokulam Kerala-in I League champion ni turin point khat chiah an mamawh tawh a, amaherawhchu Kerala club hian Samlukhai tlangval Lalromawia an ngam loh avangin an nghah rih a ṭul dawn.

Thawhlehni zan khan Sreenidi Deccan-in Gokulam 3-1 in an hneh a, Romawia'n hattrick a siam.

Inkhel dangah Moham-medan-in Brandon VL Remdika goal hnih hmangin Rajasthan FC 2-0 in an hneh a, champion inchuh boruak a nung chiah.

Gokulam leh Moham-medan inthlauhna hi point thum chauh a ni a, match hnuhnung berah an inkhel dawn. I League dan tharah head to head en tur a ni a, an inkhelh hmasak ṭumah 1-1 in an inhnehtawk a, tun ṭumah hian Kolkata club hi an chak a nih chuan an champion dawn.

'I League final' tia chhal theih Mohammedan leh Gokulam te hi May 14, zan dar 7:00 hian Salt Lake Stadium-ah an inkhel dawn a, Mizo tlangval vangin boruak a sang ang.

Romawia show
Sreenidi Deccan tan Romawia a che ṭha a, minute 19-naah Mizo tlangval Lalchungnunga freekick pet chu a tauh goal. Samlukhai tlangval ball tauh a ṭhat tluk zetin Durtlang tlangval ball vawrh luh a ṭha.

Minute 33-naah Ogana Louis thawhrah sengin Romawia hian goal hnihna a khung a, Mizo tlangval hi awmna hmun tur takah a awm. Minute li hnuah Romawia'n hattrick siam nan a tauh goal a, ball petu hi Hriangtlang tlangval Vanlalabiaa Chhangte a ni.

Champion tura point khat mamawh Gokulam-in Sharif Mukhammad hmangin minute 47-naah si phurh an sut ṭhen a, amaherawhchu goal khungtu hi minute sarih hnuah hnawhchhuah a ni a, player 10-in an tho chhuak thei lo.

A ngaihnawm
Season liam ta khan Gokulam an champion a, Romawia hian match kua khelhsakin goal kua a khung. Mizo tlangval hian khelhna hun a chang tam tawk lo a, Sreenidi Deccan a zawm a, amaherawhchu ke rek hliam vangin a khel mumal lo.

Samlukhai tlangval Lalromawia chuan, "Ke rek na vangin match sarih vel ka khel thei lo a, ka khelh hnuah pawh 100% in ka khel thei lo. Tunah chuan ka dam tawh a, Pathian zarah hattrick ka siam. Match khata goal thum khung hi thil harsa a ni a, ka club hlui laka ka theihna ka lantir thei hian ka lawmna a belhchhah," tiin Vanglaini a hrilh. Romawia hi hero of the match-ah thlan a ni a, he chawimawina hi a vawi khat dawnna a ni.

Romawia hi MPL aṭanga rawn lar chhuak a ni a, Chan-mari West FC-ah hming a chher hnuin kum 2018 khan Mizoram tan Santosh Trophy khelin final round-ah goal li a khung. Santosh Trophy zawhah Chhinga Veng a zawm a, I League club Gokulam a pan.

Beiseina siamtu Brandon
I League hi Covid-19 vangin Kolkata-ah khelh a ni a, khawtual club Mohammedan-in champion tumin player ṭha an la. Mohammedan hian season bul ṭan ṭha mah se season laihawlah an chesual.

Amaherawhchu match hnuhnung pathumah Mohammedan hian hnehna an chang a, match tawp bera Rajasthan an hneh ṭumin Brandon VL Remdika'n goal hnih a khung.

Hunthar tlangval Brandon hian minute hnihna leka goal a khung hnuah minute 56-naah a khung belh a, Kolkata club-in champion beiseina an nei leh ta.