Liverpool-in champion an la tum

Tottenham Hotspur nen an inhnehtawk hnuah Jurgen Klopp-a'n a tawp thlenga an beih tur thu a sawi a, German coach hi a titi satliah lo - thiltihin distinction-ah an pass a, champion an la beisei ve zel e.

Thawhlehni zan khan Liverpool hian khualmualah Aston Villa an lenchilh a, hma takah Douglas Luiz chuan mualneitu tan goal khung mah se Liverpool hian Joel Matip leh Sadio Mane hmangin an chhanglet a, 2-1 in an chak.

Liverpool-in hnehna an chan avangin hmahruaitu Manchester City nen an point hmuh zat a inang leh ta a, mahse, he thuziak i chhiar meuh chuan an inthlauhna hi a danglam leh tawh mai thei!

Nizan khan City hian Wolverhampton Wanderers an lenchilh a, he thu buatsaih a nih lai hian result kan hre hman lo - an chak chuan point thumin Liverpool an tlansan lehnghal thei ang.

Liverpool fapa
Villa hi Steven Gerrard-a enkawl an ni a, Manchester City an la hmachhawn dawn bawk avangin tun season Premier League champion turah Liverpool legend hian pawimawhna tak a nei.

City boss Pep Guardiola-a'n Liverpool leh Villa inkhelh hmain, "Mi zawng zawngin Liverpool hi champion turin an duh," tiin a sawi a, Liverpool fapa Gerrard chu thiam takin pressure a pe.

Mahse, Rangers boss hlui hi professional a ni a, Liverpool hmangaih mah se a hlawh petu leh chhawrtu Villa tana hnathawh chu a tih tur a ni tih a hrechiang a, Reds dang chat turin team a rem.

Liverpool fan-ten hmangaih taka 'Captain Fantastic' hming lem an pek hian 4-3-2-1 hmangin a team a rawn rem a, hmana a hming lama amah ṭana an zai sak ṭhin khan Liverpool dan chah a tum.

Barakhaih!
Villa-in goal an veng ang a, Liverpool-in an nawr dawn emaw tih laiin Villa Park-a inkhel entute an inring hman lo - minute thumna lekah Douglas Luiz-a ball tauh chu Alisson-a'n a dang per a, Brazil tana a khelhpui goal venah Luiz hian a per let chu goal-ah a chantir.

Khelmual sirah mak tiin Klopp a hawihai a, Liverpool fan-ten an thil hmuh chu awih harsa an ti. Mahse, Merseyside club hian an si phurh sut turin hun an duh rei lo - Villa fan-te hlim au thawm pawh a reh fel hmain Matip a inlar a, Villa tlarhnung buai nuai karah si phurh sutna goal a khung.

Team pahnihin goal dang an khung lawk lo a, minute 30-naah Reds-in chanchin lawmawm lo an nei zui - midfielder pawimawh Fabinho chu hliam vangin lakchhuah a ngai a, FA Cup final hmabak Reds tan chanchin lawmawm a ni lo.

Liverpool hian FA Cup final bakah league match hnih khelh tur an la nei a, Champions League final-in a la hmuak bawk. Reds fan-ten Fabinho hi dam leh vat turin an duh ang.

A tawpah Liverpool
Liverpool-in first half chhungin goal dang an khung thei lo a, chanchin lawmawm lo nen first half an khar. Tlarhnungah Villa an phui rualin counte-ah an hlauhawm ve thei reng bawk a, Reds fan thla a muang lo.

Minute 65-na a ni a, Liverpool hun a her chhuak ta nge nge - khel ṭha em em mai Luis Diaz chuan Mane tan a siamsak a, Senegalese forward hian harsatna nei loin a tauh lut.

Kum 30 mi Mane hian tun season inelna hrang hranga goal 22 a khungna chiah a ni a, assist vawi li a nei tawh bawk - Ballon d'Or an sawi ri leh tawh!

Mane piahlama lam hmaih thiang lo chu Diaz a ni a, Colombian forward hian sapṭawng thiam lo mah se khelmualah a theihna a pholang ṭhin a, thlasik transfer-ah khan Reds hian lalut ta lo se quadruple an sawi ri kher lo mai thei.

Hmabak hautak
Inrinni zan dar 9:15-ah FA Cup final khelh a ni dawn a, Wembley Stadium-ah Chelsea leh Liverpool-in champion an inchung. Reds-in he inkhel tur hi an ngaihtuah tel lo thei lo a, Jurgen Klopp-a'n Spurs laka inkhel aṭangin player panga a thlak danglam.

Mohamed Salah pawh bench-ah dah a ni a, Liverpool forward chhuanvawr hian minute 72-naah Diaz thlak mah se danglamna a thlen thei lo a, AFCON final-a Egypt a tlawmpui hnuah Salah hian ngai a la awh thei lo.

Salah hian AFCON hma khan Reds tan inelna hrang hrangah match 26 khelin goal 23 a khung a, assist vawi kua a nei. AFCON hnuah match 22 khelin goal sarih chiah a la khung a, assist vawi ruk a nei bawk.

Liverpool-in League Cup bak nomawi chawi belh zel an duh dawn chuan Salah a 'form' leh a ngai - Villa lakah pawh Reds an vannei tel a, Danny Ings-a'n uiawm taka chance a hlahte kha a ṭum fuh zan ni se khung ngei tur a ni.

City kan ngaihtuah lo a, ka naute pawh chutiang rilru pu tur chuan ka ti - champion ngei tumin theihtawp kan la chhuah reng a ni. Hnehna chan kan ngai tih kan hria a, tunah chuan hahdam a, FA Cup final khelh leh chu kan hmabak a ni.
Final zawng zawng khel turin kan tling a, engmah hi a awlsam dawn lo tih kan hria. Match pawimawh tak kan nei nual a, Ningani aṭangin kan inpuahchah lehnghal ang.
- Jurgen Klopp, Liverpool manager

Liverpool lakah chuan hna a awlsam thei lo - team ṭha tak, coach ṭha ber pawlin a enkawl an ni a, chuti chung chuan beisei neiin inkhelh chhung tam zawkah khan a chungnung zawk kan ni thei a ni. Chance tam tak kan nei a, Liverpool kha hahdamin an khel lo.
- Steven Gerrard, Aston Villa coach