Football Coaching Course an khar fel

Asian Football Confede-rations (AFC) hnuaia football coach ni thei tura inzirna, C Diploma Coaching Course thawh hnihna chu Thawhlehni khan Regional Sports Center, Saidan, Kolasib-ah khar a ni.

Coaching Course hi All India Football Federation (AIFF) tirh instructor Mariano Diaz kaihhruaina hnuaiah neih a ni a, ni 12 chhung neih a ni. Thawh khatna hi nikum December thla khan neih a ni a, ni sarih chhung an nei a, thawh hnihnaah hi ni nga chhung neih niin May 6-10, 2022 chhung khan neih a ni.

Thawh hnihna bikah hian instructor Diaz hi goalkeeping coach tawnhriat nei ṭha Gumpe Rime-a'n a rawn pui bawk. Coaching course hi practical leh theory a kalpui a ni a, Mizo football coach 19 bakah state danga aṭanga coach pathum an tel.

A kharna hunah hian MFA thawhpui Mizoram Youth Commission (MYC) Under Secretary H. Lalnunzuala chu khuallian a ni a, coaching course hlawhtlin nana MYC-in sum beitham tak an thawh hmanga MFA ten felfai taka coaching zirna an huaihawt chu lawmawm a tih thu leh MYC chairman pawhin hun lo awm tura thawhho zel a duh thu a sawi.

Course instructor Mariano Diaz chuan, "ISL a khel phak Mizo thalai ṭhahnem tak an awm hian Mizoram chu football player leh coach ṭha tak tak chher chhuahna hmun a ni tih a lantir chiang hle a ni," a ti a, infiammite hmasawnna atana state football association leh sorkar an thawk dun chu ropui a tihzia leh state dangte tan pawh entawntlak a tih thu a sawi tel bawk.

AFC C-Diploma Coaching Course hi nikum December thla khan Saidan, Kolasib-a Sports Centre ah hian a thawh khatna neih a ni. Mizo football coach 24 te training pek an ni a, tun ṭum - a thawh hnihnaah hian mi 19 an tel thei a, state pawn aṭangin coach pathum an rawn tel thar thung a ni.