Man City leh Dormund an inrem ta

Norway striker Erling Haaland chungchangah Manchester City leh Borussia Dortmund ten inremna an nei tawh. Kum 21 mi Haaland hian July thla hian Etihad Stadium a pan ang.

Pep Guardiola hote hian Haaland-a release clause chu an tinung a, goal khung thei bik striker hi euro maktaduai 60 (51.2) chauhin an la thei dawn. Man City thuchhuah an siam hnu lawkah Dortmund pawhin RB Salzburg aṭangin Karim Adeyemi an lakluh thu an puang ve bawk.

A chiang ta
Man City hian club tana goal khung tam ber Sergio Aguero-a'n nikum nipui transfer-a Barcelona a pan hnuah a thlakna tur striker an zawng a, tunah chuan an hmu ta - a hming chu Erling Haaland a ni.

English club chuan, "Erling Haaland chungchangah Borussia Dortmund nen a thuphungin inremna kan nei tawh. Transfer tihlawhtling turin club leh player-te inkarah inremna neih a ngai thung," tiin thuchhuah an siam.

Thawhṭanni khan Haaland hian Belgium-ah medical a paltlang tawh a, Norwegian striker hi La Liga club lian pahnih Real Madrid leh Barcelona te nen pawh sawizawm ni mah se Etihad pan a thlang zawk.

Tu nge Haaland?
Haaland a pa Alfie Haaland hi Premier League club hrang hrang Nottingham Forest, Leeds United leh Manchester City tan a khel tawh a, Norwegian striker hi Leeds-ah a piang.

Kum 21 mi Haaland hi a pa Alfie angin Norwegian club Bryne-ah bul a ṭan a, Molde a zawm hnuah Red Bull Salzburg-ah a intuai hriam. Khawvel hriat ṭan a hlawhna tak erawh 2019 FIFA U-20 World Cup-ah a ni a, Honduras 12-0 a an hneh ṭumin goal kua ngawt a khung.

Haaland pa Alfie hi Roy Keane-a'n a khupa a tlawh luih avangin player hriat hlawh tak a ni a, a pa larna leh a goal khung theih avangin a lar zui. Salzburg tan match 27 khelin goal 29 a khung a, Dortmund tan pawh match 88-ah goal 85 a khung.

Man City mamawh
Man City-in nipui bazarah Harry Kane lakluh an tum a, pound maktaduai 127 (€150m) an seng ngam tiha sawi a ni. Tun ṭumah hian Kane tlukpui Haaland hi pound maktaduai 51.2 (€60) chauhin an lalut thei dawn. A tira euro maktaudai 75 vela rin kha a ni a, tuna an lakna zat hi chu tunlai transfer bazar thlir phei chuan City hian a la tlawm hle.

Haaland hian season nga chhung atan contract a ziak dawn a, kum 2027 thleng Etihad Stadium-ah a cham dawn tihna a ni. Pep Guardiola chuan, "Thil awm dan kan hria, hmalam hun emaw season thar emaw sawi ka duh lo. Player thar chuan team an ti chak a, mahse defender pakhat emaw striker pakhat emawin kan goal venhim emaw goal khung emaw harsatna an siam ṭha lo," tiin Haaland vangin phur hluai a tum lo.

Chutihrualin Haaland hian City ṭantute a ti phur a, an elpuite pawhin an ngaihven. Liverpool manager Jurgen Klopp chuan, "City hi player pakhat vanga chak an ni lo. Khelh dan phung nghet an nei a, Erling pawhin vawi leh khatah awlsam takin a khung thei tih a inhria ang a, nuam pawh a ti ang. Dortmund-ah inhliam vangin a buai ngun a, chutihrualin a dam ṭhat chuan goal khung thei bik a ni. Player ṭha tak an la lut a, kan tan chuan a pawi thung," tiin a sawi.

Haaland hian Europe club lian hnawlin City a thlang a, a chhan pawha ṭha. City tan hian a pa Alfie a khel tawh a, Guardiola hnuaia khelh a châkawm a, tun hnaiah nomawi ṭhahnem tak an chawi avangin sulhnu nei ṭha duh tan Etihad Stadium pan hi a awm viau bawk.

Man City-in an mamawh tak striker Haaland an hmin thei a, hei hian nipui transfer boruak a ti ngaihnawm sawt dawn. Norwegian striker hian khelhna hmun a chan tam a rinawm a, City player zingah chhuak an awm ang.

Brazilian forward Gabriel Jesus chu Arsenal nen sawizawm a ni a, chutihrualin Fernandinho-a'n contract a pawhsei loh avangin player ṭha dang pawhin City hi an zawm an rinawm hle.