Champions League: Kalphung thar an hmang dawn

European football-a club inelna sang ber Champions League kalphung chu kum 2024 aṭangin tihdanglam a ni dawn a, hei bakah hian club 32 inel ṭhin chu club 36-ah tihpun a ni bawk.

Champions League-a team inel chu paliin a pung dawn tihna a ni a, hei hian UEFA sum lakluh kawngah nasa takin a pui tel nghal tura ngaih a ni.

Mahse, European football-a club record ṭhate tan hmun ruak pahnih chiang sa anga sawi erawh tih a ni dawn lo a, UEFA president Aleksander Ceferin chuan, "Club zawng zawng tan kawng hawn reng kan duh a ni," a ti.

Ceferin chuan sawi zawmin, "UEFA chuan infiamna thinlung dik tak puin, inelna thianghlim neih a thlawpzia a pholang leh ta a, hmun ruak thar kan siamte hnawh khah dan tur hian European infiamna kalphung a mil thlap a ni," a ti a, an ruahmanna a ṭhat tawk thu a sawi.

Tute tan maw?
Kum 2024 aṭangin Champions League-a club inel ṭhin chu paliin tihpun a ni dawn a, zawhna langsar tak ni nghal chu he hmun ruak pali hi khawi aṭangin nge hnawhkhah a nih ang, tih chu a ni.

UEFA national association ranking-a pangana ram aṭangin hmun ruak pakhat hi hnawh khah a ni ang a, an league-a pathumnain he hmun hi an luah ang.

Tun dinhmunah chuan UEFA ranking-a pangana chu France an ni a, kalphung thar hi season thara hman nghal tur chu ni se Ligue 1-a pathumnain Champions League an khel thei dawn tihna a ni.

Kalpui mek danah erawh Ligue 1-a pathumna hi Champions League group stage an tling nghal ngai lo a, third qualifying round an khel leh phawt ṭhin - kuminah pawh Monaco-in an khel a, playoff thleng inpetkai mah se Shakhtar Donetsk ngam loin an tla.

A dang
Hmun ruak dang pakhat chu tualchhung league champion tan dah a ni dawn a, hei erawh qualifier-a Champions path an tih kaltlangin a ni dawn a, he path aṭang tling ṭhin pali chu pangaah tihsan a ni ang.

Champions League khel tur club dang pahnih hi season hman zawh taka CL-a ram pakhat club-te chet ṭhat dan a zirin ram pahnihin an insem zel thung ang.

CL group stage-a ram khat aiawha telte point hmuh zat chu an ram aiawha tel zat club hmangin sem leh tur a ni a, chuta point hmu hnem ram chuan season tharah club pakhat an neih belh thei dawn tihna a ni.

Entirnan, tun season-ah England aṭangin club paliin Champions League an khel a, club palite point hmuh zat hi paliin sem leh tur a ni ang a, chutah chuan point hmu sang ram pahnihah an tel phak chuan hmun ruak pakhat an neih belh ang.

A sawifiahna
Hmun ruak pahnih hnawh khah tur hi sawifiah dan awlsam a awm - season tharah dan thar hi hman ni dawn ta se, tun season-a an chet dan en tur a ni a, England leh Netherlands-in hmun ruak pakhat ve ve an neih belh ang.

Tun season-ah hian England aṭangin club pali an tel a, an point hmuh zat belhkhawm chu point 54 a ni a, hei hi sem rual chuan English club pakhat zelin 13.5 hmu phak ang an ni.

Netherlands aṭangin Ajax chiahin CL an khel a, point 18 an hmu - heti zat point chawhruala hmu phak ram dang an awm lo a, hei vang hian England leh Netherlands tan team a thawh belh theih phah dawn.

Mahse, hei erawh a sawifiahna chauh a ni a, season tharah hman a la ni dawn lo - kum 2024-a hman ṭan tur a ni a, a hman ṭan hma season-ah mahni ram aṭanga Champions League khel tur duh belh chuan ṭan deuh mai tur a ni!

Mangṭha match ruk
Tuna Champions League kalphungah chuan, group pariatah ṭhen hran niin, group khatah team pali zel an awm - an inkhelh kual vek hnuah a sang pahnihin last 16 an lut ṭhin a, group stage-ah match ruk an khel tihna a ni.

Mahse, kum 2024 aṭang chuan group hi ṭhen hran a ni dawn lo a, team zawng zawngin league match riat ṭheuh an khel ang a, match li chu mahni home-ah khelin, match li dang chu khualmuala khelh tur a ni thung.

Table chung lama awm team pariat chu knockout stage an lut ang a, pakuana aṭanga 24-na ten two-legged playoff hmangin knockout round lut tur an zawng ve leh ṭhin bawk ang.

UEFA chuan ruahmanna hi Europa League leh Europa Conference League-ah pawh hman a nih tur thu an sawi a, team pawh 36-ah ve ve tihpun a ni dawn. Mahse, ECL bik erawh league stage match hi match ruk khelh tur a ni ang.

ECA-in an pawm
European football-a club 240 chuang telna European Club Association (ECA) chuan UEFA thutlukna hi an pawm thu an sawi a, UEFA tan thu hriat nuam tak a ni ang.

ECA chuan, "Ruahmanna thar hian European football ṭhan zel nan hna pawimawh tak a thawk dawn a ni," an ti a, thil langsar tak pakhat erawh UEFA sum lakluh a pun phah dawn!

Champions League kalphung thar hian match a tipung dawn - group stage-a match 96 awm ṭhin chu match 64-in game a pung dawn a, kum khata UEFA-in club inelna aṭanga an lakluh euro tluklehdingawn 3.5 chu 40% vela sang tura ngaih a ni.

UEFA sum lakluh a pun chuan club sum dawn pawh a tam dawn tihna a ni a, ECA-in UEFA hmalakna an thlawp hi thil mak a ni hran lo.