Playoff khel turin Gujarat an tling

Indian Premier League-ah Gujarat Titans chu playoff khel tura tling hmasa ber a ni. IPL club thar Titans hian hian Thawhlehni zan khan anmahni ang bawka club thar Luknow Super Giants chu 62 runs in an hneh a, match 12-ah point 18 hmuin playoff khel turin dinhmun an sawhnghet.

Maharashtra Cricket Association Stadium-ah Gujarat Titans hi ṭhumvawrah an vannei a, bat hmasak an thlang. Opener Shubman Gill-a'n thi loin 63 runs a siam a, David Miller (26) leh Rahul Tewatia (22*) te che ṭha bawkin over 20-ah 144/4 runs an siam.

Super Giants tan target harsa niin lang lo mah se Titans bowler Rashid Khan a che ṭha. Afghan bowler Rashid hian wicket li lain 24 runs chauh a pe a, Super Giants hi over 13.5-ah 82 runs chauh siamin an thi fai vek.

Zanin dar 7:30 hian MS Dhoni hote an inlan dawn a, IPL champion lai Chennai Super Kings hian table mawngphaha awm Mumbai Indians an hmachhawn ang.