Arsenal-in Jesus an beisei

Manchester City-in Borussia Dortmund aṭanga Erling Haaland an lakluh tak avangin Gabriel Jesus chu a chhuah ngei a rinawm. Brazilian forward hi Arsenal nena sawizawm a ni a, club dang parukin an beisei bawk.

Jesus-a agent Marcelo Pettinati chuan, "Arsenal nen inbiakna kan nei tawh a, an hmachhawp ṭha kan ti. Thil thleng thei a ni. Chutihrualin Gabriel duhtu hi club dang paruk an awm a, tunah erawh Man City tana season ṭha tak hmang turin a insawrbing ang," tiin a sawi.

Kum 25 mi Gabriel Jesus hian kum 2017 khan Palmeiras aṭangin Man City hi euro maktaduai 33-in a zawm a, English club tan hian season ruk chhungin match 157 khelin goal 58 a khung. Tun season tawp lamah Jesus hi a chet ṭhat avangin nipui bazarah a hlu sawt ang.

Gunners hian Leices-ter City midfielder Youri Tielemans an beisei mek bawk. An tum anga Champions League an khel phak a nih chuan, nipui bazarah an che na zual thei sawtin a rinawm.