Hamilton-a'n knighthood a phu - Murray

British rama chawimawina sang ber knighthood chu Lewis Hamilton hnenah nakkumah hlan a nih tur thu sawi a awm a, Grand Slam vawi thum champion tawh tennis star Andy Murray chuan a phu a tih thu a sawi.

Kum 33 mi Murray chuan, "A hlawhtlinna hi en ila, a phu a ni. Kan ram chanchina infiammi hlawhtling ber zingah a tel pha a ni," tiin a sawi. Tennis player Murray pawh hian kum 2017 khan knighthood chawimawina hi a dawng tawh.

Hamilton hi November 15 khan Turkish Grand Prix-ah pakhatna niin F1-ah a vawi sarih nan a champion a, Michael Schumacher record a nih rual.

Kum 35 mi driver hi kum 2009 khan MBE chawimawina pek a ni tawh a, nakkum chawimawina pek hun atan UK prime minister Boris Johnson-a'n knighthood dawng tura a rawt avangin dawn ngei a rinawm hle.