Rome khawpuiah Djokovic a chak

Novak Djokovic chuan kawng dik a zawh leh ṭan dawn ta niin a lang. World number 1 hian Thawhlehni zan khan Italian Open khelh laiah Aslan Karatsev chu straight set hmangin a hneh a, harsa lutuk loin second round a paltlang.

Rome khawpuia inkhelah Djokovic hian Russian player Karatsev hi 6-3, 6-2 in a hneh a, set hnih an khelh chhung hian a service vawi hnih chiah a hloh a, a khingpui service ṭum li a chhuhsak thung a ni.

Tun thla chawhnu lama kum 35 tling tur Djokovic chuan, "Inkhel entu hian a hmuhnawm bakah hlimawm hi hmuh an duh, tun ṭuma khan an duh ang ṭhenkhat chu an hmuh theih ka beisei, duhthusam vek erawh a la ni lo.

"Min ṭantute hmaa hnehna chan hi chu a nuam," a ti. A tihsual vangin a khingpuiin point 10 chauh a hmu a, tihsual a nei tlem hi lawmna tur a ni. A vawi ruk nan Italian Open nomawi chawi theih ngei a beisei.

World number 1 hian a match lehpekah chuan Stan Wawrinka leh Laslo Djere te inkhela chak zawk a hmachhawn leh ang, Grand Slam vawi thum champion tawh Wawrinka hi kum khat chung hnua hnehna rawn chang thar leh a ni a, beisei san ngam a la har.

Mipa singles final inkhel dangah, service nei ṭha tak John Isner chuan Miami Open semifinalist Francisco Cerundolo chu 6-4, 6-3 in a hneh a, a match lehpekah chuan vawi 10 champion tawh Rafael Nadal a hmachhawn ang.

Player langsar zinga mi Diego Schwartzman pawh a chak. Argentine tlangval hian Miomir Kecmanovic chu 6-2, 3-6, 7-6 (3) in a hneh. Inkhel dangah Grigor Dimitrov leh Sebastian Baez te pawhin an khingpui an paltlang ve bawk.