Saints tan Walcott goal a tawk zo lo A vawi khat nan Burnley chak ve ta

Thawhṭanni zan khan Premier League inkhel pahnih a awm. Tun season league match vawi kua an khelh tawh china a vawi khat nan Burnley an chak a, an mikhual Crystal Palace chu 1-0 in an hneh.

Inkhel dangah Theo Walcott chuan a chawr chhuahna Southampton tan goal a khung a, mahse hnehna chan nan a tawk zo lo. Season bul ṭan fuh tak Saints hi khualmualah Wolverhampton Wanderers nen 1-1 in an inhnehtawk.

Season hmasa khan Burnley hi team hmuhnawm tak an ni a, an khelmual Turf Moor phei chu mikhual tana lenluh châk awm lohna tak a ni hial - kuminah erawh beisei an phak lo. An match hmasa pasarihah vawi nga chak loin vawi hnih an inhnehtawk thung.

Palace tlarhnung lam tihsual zarzotu Jay Rodriguez-a ball pek dawngtu Chris Wood chuan minute riatna lekah goal a khung a, goal dang a lut zui tawh lo a ni. Table mawng lama talbuai lai Clarets lamin point thum hlu tak an hlawh chhuak. 

Palace lamin Covid-19 vangin an thiampuipa Wilfried Zaha an chhawr thei lo. Ivory Coast international awm loh a lang a, an goal nawr a na tawk lo. Chelsea aṭanga an hawh striker Michy Batshuayi chuan hun ṭha nei mah se keeper Nick Pope a paltlang zo lo.

Hun tawp dawnah substitute Christian Benteke-a'n Palace tan hun ṭha nei leh mah se Pope bawk a paltlang zo lo, manager Sean Dyche nauten an goal an venghim thei a, tun season league match bikah an muala an goal neih chhun an chakpui.

Clarets boss Dyche chuan, "Point thum hlu tak a ni a, a pawimawh lai pakhat chu a hniam zual pathum aṭanga kan tal chhuak kha a ni. Player an fit ṭha leh tawh a, phur leh thatho taka an khel a nih chuan beiseina nen hma lam kan thlir thei ang," a ti.

Burnley hian Inrinni zanah Man-chester City an hmachhawn chhunzawm dawn. Pep Guardiola naute hi Tottenham Hotspur laka chak lo hliam an ni a, insiamṭhat an tum dawn. Clarets tan Etihad Stadium a lenluh hi thil châkawm a ni lo ang.

Palace manager Roy Hodgson chuan, "Match kua khelh aṭangin goal kua kan khung thei a, season hmasa ai chuan kan tlarhma a hriam. Goal kan khung loh vanga min sawisel ṭhintute hian kan sulhnu leh goal khungte hi an chhut chiang hmasa tur a ni.

"Khelh hmabak match 29 ngawt kan la nei a, hengah hian goal chu kan la khung leh em em ang. Player mal mai ni loin a hran hranin an khung ngei pawh ka ringin ka beisei bawk," a ti a, player pawimawh Zaha inlan thei lo chu chhuanlam atan a hmang duh lo.

Southampton-in hnehna chang ni se la chuan Premier League table-ah pathumna dinhmun an luah ang. Mahse, Walcott-a goal chu Pedro Neto-a'n a sut avangin team pahnihin point khat ve ve an hmu a, Saints hi panganaah an awm.

Walcott-a'n a inzir chhuahna club tan goal a khung leh a, English forward hian tun hma lam ngaihtuah chhuak lehin a naupan lai a ngaih thu a sawi chhuak. Saints aṭang hian kum 16 mi chauh ni chungin Arsenal a zawm a ni.

Gunners aṭangin Everton a pan a, Toffess hian season khat chhung cham turin Southampton lamah hian loan hmangin an chhuahtir ve leh a ni. Walcott chuan, "Naupan lai kha rilruah a rawn lang thar nasa hle, ka taksa pawh a fit ṭha.

"Hun rei tak chhung football khelh ka duh a, min ring ngamtu manager chungah ka lawm takzet. Saints hi a sang thei ang ber thlenpui ka tum dawn," a ti. England tana match 47 khel tawhtu hi kum 31 mi a ni ve tawh a, a hun hnuhnung lam a hmang ve mek.