F1 intlansiak 24 neih an tum?

Formula One chairman Chase Carey chuan a tam thei ang ber intlansiak neih chu an thupui a la nih reng thu a sawi a, kum 2022 aṭangin emaw a hnu lamah erawh chuan inelna 24 lai pawh an nei mai thei niin a sawi.

Tun season-ah hri leng vangin ruahman danin an tlan thei lo, season tharah erawh intlansiak 23 awm turin ruahmanna an siam a, an ti tlang thei a nih chuan inelna neih tam ber ṭum a ni dawn - tun hmain vawi 21 aia tam neih a la ni ngai lo.

Carey chuan, "Tun aṭanga rei lo teah chuan inelna 24 a awm theih kan beisei. Kuminah hian a ṭulnain min nang a, ram pakhata inelna vawi khat aia tam neih theih a nihzia a takin kan hmu.

"Team leh sumdawnna lama thawhpuiten an rem tih a, ruahmanna a kaltluang a nih chuan mipuiin an hlut ang ngeiin an en duh pek kan tum," tiin a sawi a, car intlansiakna sang ber hi chawi nun thar leh an tum hle.

Tun hnai season sarih chhung zet chu Mercedes team in F1 inelna an thunun hneh hle, team hlun leh ṭha ni ṭhin Ferrari-in beisei an phak lo. Italy rama hmunpui nei Ferrari hian thawhchhuah an tum a, season tharah chuan Mercedes elphak an tum ngawrh hle ang.

Driver champion Lewis Hamilton-a'n Mercedes tana a contract a hmang zo dawn a, season tharah eng car ber nge a khalh dawn a la tichiang thei lo. A team ngaiah awm chhunzawm tura ngaih ni mah se, team dang tan pawh thlen theih a ni ve bawk.