Nupui neih nia goal ven thlangtu Luke Borean

Queensland Lions FC goalkeeper Luke Borean chuan a nupui neih niah a ṭhiante phatsan duh loin goal ven hna a thawh chhunzawm a, National Premier Leagues Queensland semifinal-ah a nupui neih vangin a inlan thei dawn lo emaw ti mah se goal a veng!

Australia rama, Queensland state-a football league sang ber inelnaah Lions FC hian semifinal an lut a, mahse coronavirus vangin semifinal hi khelh hun tura ruahman saah khelh theih a ni lo. 

Semifinal khelh hun a thleng a, Lions tana goal vengtu Luke Borean nupui neih ni nen a in nang - Borean hian a nupui thar Ellen Hepburn nen, "Tiam tlat e," an tih zawh hnuah an inkhelhna khelmual chu car nen a pan nghal!

Lions coach Darren Sime chuan, "Borean-a rawn thleng chiah chu a ṭhianten mak ti takin an lo en a, an ka hau mai a ni," a ti a, kum 30 mi keeper hian save ṭha tak neiin a team hi Peninsula Power lakah 4-1 in hnehna a chanpui. 

Sime chuan, "Thawh-lehni khan training a rawn kal a, hahdam takin a awm. Kei chuan reserve keeper Ryan Murphy pui tura ka mamawh thu ka hrilh a, ani chuan, 'Simsey, thlamuang takin awm rawh, engkim a ṭha vek ania,' a ti sam et a ni," a ti!

Luke Borean-a'n a team tana goal a veng lai hi amah hrethiam taktu a nupui chuan khelmual sir aṭangin a lo en. Sime chuan, "Player-te nupui neihna meuh dal tur khawpin club chu a awm dawn lo a, inneihnate chu hlim taka hman tur a ni. 

"Mahse, an hun tawn hlimawm tak keimahni nena hman an duh erawh kan lawm takzet a ni," tiin a keeper-te nupa chu a fak.