Raonic ngamtu Rafael Nadal

Rafael Nadal chuan Australian Open 2017 semifinal a lut ta. Kum 2009 Melbourne Park champion hian nimin tlai khan seeded pathumna Milos Raonic chu darkar hnih leh minute 44 chhunga 6-4, 7-6(7), 6-4 a hnehin a vawi li nan Australian Open quarterfinal a paltlang.

Inkhelh ṭan hmain Grand Slam vawi 14 champion tawh Nadal hian a khingpui tur Raonic hi tunlai khawvela player ṭha berte zinga mi a nih thu leh, a ball vuak na tak chu ven ngun a ngaih tur thu a sawi a; Spain tlangval hian Rod Laver Arena-a inkhelah a service la vekin a khingpui service vawi hnih a chhuhsak a, attacking tennis huaisen taka khelin hnehna a chang a, final lut tur chuan Grigor Dimitrov a paltlang leh a ngai dawn.

Ṭhum vawra chak zawk Raonic-a'n service hmasak a thlang a, Canadian tlangval hian 240km/h zeta nain ball a vuak theih avangin game hmasa ber a la nghal. Tawnhriat ngah tawh Nadal a buai lo, a service a hum vek bakah Raonic service vawi khat chhuhsakin minute 43 chhungin set khatna a la.

Set hnihnaah pawh an service an hum dun ve ve a, tie break khelh a ngai. A match hnuhnung zawka Roberto Bautista Agut laka vawi 33 ngawt aces siamtu Raonic-a'n set point vawi hnih a hmuh a chhawr ṭangkai theih loh laiin Nadal-a'n set lak theihna hun ṭha ṭum khat a neih a bawhpelh lo thung.

Australian Open nomawi vawi khat chawi tawh Nadal-a'n set thumnaah a service hmasa zawk a, a hum tluan vek bawk. Ball vaw na leh khingpuite nawr chiai thiam Raonic tan hmunawl a siamsak eih lo. Nadal hian set hnuhnung bera break point a hmuh hmasa berah hlawhtling nghalin hnehna a chang.

Player pahnihte vawi kua an intawnna a ni a, Nadal hian vawi sarih hnehna chang tawhin Raonic hian vawi hnih hnehna a chang tawh thung. Australian Open hma chiah khan Raonic hian Brisbane International-ah hnehna a lo chang tawh.

Kum 30-a upa Nadal chuan, "Mi hnuaichhiah leh mi chunga invai vung ching mi ka ni lo a, hnehna ka chang a nih pawhin ka rilru chhungrilah hian khingpuite zahna a awm ṭhin. Tennis ka khelh hun chhungin hun harsa leh hlimawm tam tak ka tawng tawh a, vawiina ka tawn hi chu hun hlimawm leh ṭha bik a ni," tiin a sawi.

Nadal hian nikum Wimbledon finalist Raonic chu player ṭha leh huaisen a nih thu a sawi a, semifinal-a a khingpui tur Grigor pawh khawvela a ṭha berte zinga mi nia a hriat thu a sawi bawk.

King of Clay tia hminglem an vuah Nadal hian kum 2014 French Open hnuah Grand Slam inelna bikah hian semifinal a luh lehna hmasa ber a ni a, nikum khan a ban rek na vangin Wimbledon a khel thei lo hial. Kuminah a hliam dam tawhin tunhma lama kan hmuh ṭhin 'Hneh theih loh Nadal' ang maiin a khel chhuak leh ta!

Dimitrov la chak vek
Kuminah Grigor Dimitrov-a'n match 10 a khel tawh a, hnehna a chang vek. Kum 2014 Wimbledon semifinalist hian nimin khan David Goffin chu darkar hnih leh minute 12 chhungin 6-3, 6-2, 6-4 a hnehin a vawi hnih nan Grand Slam semifinal a lut.

Seeded 15-na Dimitrov hian Australian Open inbuatsaih nan hian Brisbane International-ah inlanin nomawi a chawi a, Melbourne-ah hian match nga a khelh aṭangin set hnih chiah a la hloh a, a khel ṭha tluang hle.

Kum 25-a upa Dimitrov chuan, "Set hmasa berah kha chuan ka khelh dan phung ka phak lo deuh tih ka hria, chutihrualin ka buai phah lo. Tihsual ka nei tlem a, holam taka point ka hmuhtir mai mai loh avangin nuamsa takin hnehna ka chan theih phah," tiin a sawi. Bulgarian star hian kum thum hnua major tournament semifinal a khel leh thei tur chu a lawm thu a sawi tel bawk.