Anfield-ah Coutinho a cham zel dawn

Liverpool fan-te hah­dam takin an mu thei ta! Tun hnaia Barcelona lam pan tur anga sawi Philippe Coutinho chuan Anfield-ah kum nga dang cham chhunzawm turin contract thar a ziak a, kar khatah £150,000 a hlawh dawn.

Kum 24-a upa mid­fielder hian January 2013 khan Inter Milan aṭangin Reds hi pound maktaduai 8.5-in a zawm a, a contract thar ang chuan kum 2022 thleng Anfield-ah a cham ang. Liverpool tan vawi 163 inlana goal 34 khungtu midfielder hi a contract thar avang hian Reds player zinga hlawh hnem ber a ni.

Brazil international chuan, "He club-ah hian kum tam zawk cham ka duh avangin contract thar ka ziak a, ka tan chuan chawimawina ropui tak a ni. He hmun ka lo kaltirh khan mi zawng zawngin min lawm a, ka ni hmasa ber aṭangin fan-te kha ka lam ṭang an ni nghal a ni. He club chungah hian ka lawm a, ka contract thar hi he hmuna ka hlim zia nemnghetttu a ni," a ti.

Liverpool manager Jurgen Klopp chuan, "Kan tan chuan chanchin thar duhawm tak a ni. Coutinho hi world class player a ni a, khaw­vela ṭha ber berte nena huang khata awm an ni. A duhthusam leh hma­chhawp te Liverpool-ah a hlawhtlin theih a beisei a, hei hi kan hmachhawp ropui tak nem nghettu a ni," tiin an tumah an chian thu a sawi.

Coutinho hi a kerek hliam vanga a chawlh reng hnuah tun hnaiah a lo kir a, a kereka hliam a tawrh hma hian Reds tan inelna hrang hrangah match 14 khelin goal ruk a khung hman.