Olympic tel theihna hun ṭha

Indian Speedstar Season II chu January 27, Zirtawpni dar 10:00-ah RG Stadium, Mualpuiah neih a ni dawn.

Inelna hi National Yuva Co Operative Society (NYCS) leh GAIL India te buatsaih niin Aizawl bikah hian Mizoram Athletics Association-in an buaipui ang.

Inelna hi 100m, 200m leh 400m ah te neih a ni dawn a, thlanchhuahte chuan Guwahati-ah zonal trial an hmachhawn ang a, a che ṭhate chuan Delhi-ah national trial an nei leh ang. Trial pathum paltlang theite chu GAIL company-in kum li chhung a thlawnin an enkawl ang a, an hmathlir chu Olympic 2020 leh 2024 a ni.

Naupang tel theite hi kum 11-14 (January 1, 2003 - December 31, 2005) leh kum 15-17 (January 1, 2000 - December 31, 2002) inkara piang te an ni. Registration hi RG Stadium-ah neih tur a ni a, naupang trial turte hian passport size copy khat leh birth certificate xerox attested copy ken tur a ni.

Inelna buatsaihtute hian naupang trial hmachhawnte hi ei leh in an tum sak ang a, DA an pe bawk dawn a ni.