Spurs chhuahsan a atthlak ang - Kane

Tottenham Hotspur striker chhuanvawr Harry Kane chuan London club chu khawvela club ṭha pawl ni tura insiam chho mek an nih avangin tun ang huna chhuahsan chu thil atthlak tak a nih tur thu a sawi.

Spurs hian season hmasa khan pathumna nichungin Premier League an khar a, tun season-ah pawh an thiam an la theihnghilh lo tih pholangin nomawi beisei ngam zingah an tel mek.

England international chuan, "Ka ṭhiante zinga tupawh hian Spurs an chhuahsan a nih chuan an mawl ka ti ngawt ang. Hmasawn zawngin kan kal mek a, nomawi chawi hi kan hlat tawh loh avangin tun hi Spurs chhuahsan hun a ni lo," a ti.

Kane chuan sawi chhunzawmin, "Khawvela manager ṭha ber pawl kan kawl mek a, a ṭha ber ti pawha sawi ngam hial a ni. Stadium thar kan nei ṭep tawh bawk a, he club hmabak hi a eng em em a ni," tiin a phur hle.

Kum 23-a upa striker hian tun season-ah Spurs tan inelna hrang hrangah match 19 khelin goal 15 a khung leh der tawh a, Premier League table-ah pathumna dinhmun luah mekin hmahruaitu Chelsea chu point kuain an phak lo mek.