Bagan chelhtu Mizo rawlthar awmna DSK
Thawhlehni zan khan DSK Shivajians chuan match li chak zawn tawh Mohun Bagan an mikhual a, goal khung loin an inhnehtawk - he inkhelah hian Mizo pali, rawlthar rual ṭhah chu DSK lamah an inlan.
Inkhel thlirin DSK-in chak an phu zawk a, North Korea international Kim Song Yong-a'n hun ṭha vawi tam nei mah se Bagan keeper Debjit Majumder a paltlang thei lo a, goal post vawi khat a pet per bawk.
Pune club tan Bosnian defender Saša Kolunija chuan minute 58-naah goal khung mah se referee-in foul a ham avangin goal-ah pawm a ni lo a, second half-a tlan lut Lallianzuala Chhangte-in Bagan keeper Debjit enchhinna vawi hnih lai a nei bawk.
Kolkata club tan Jeje Lalpekhlua'n inkhel bul a ṭan a, minute 34-naa AIFF player of the year goal shot hi defender Gouramangi Singh chuan ṭha takin a lo dang hman - Jeje hi a hlauhawm zui lo hle.
Zuala a phur
DSK tan Jerry Mawihmingthanga, Jerry Lalrinzuala leh Sairuatkima ten inkhel bul an ṭan a, second half aṭanga tlanlut Lianzuala a hmuhnawm hle bawk.
Lunglei rawlthar Lianzuala chuan, "Kan coach hian Mizo min duhsak em em a, players thawkrim a ngainat avangin Mizo dinhmun a ṭha bik a ni. Kan khelh danah kan lawm a, Mohun Bagan laka point hlawh chhuah hi result chhia a ni ngai lo," tiin Vanglaini palai a hrilh.
DSK hian February 1-ah Aizawl FC an len chilh dawn a, Lianzuala chuan Mizoram kal tura an inpeih thu a sawi. India tana a match hmasa bera goal hnih khung thei forward chuan, "Bagan draw hlim kan nih avangin kan phur a, coach pawhin squad-ah Mizo tam zawk min hruai ka ring. Min mikhual turin Aizawl FC lo inpeih rawh se," tiin a phur hle.
Jeje a zam lo
Mizo tlangval Jeje chuan, "Ni danga kan game kan pha lo a, midfield-ah kan ngam lo a ni. Mahse, chak zo lo mah ila, inzir belh nan kan hmang ang a, kan result hi a ṭha zawngin kan hmang ang," tiin Vanglaini palai a hrilh.
Jeje chuan sawi chhunzawmin, "Thla hnih zet hliam vanga inkhelh loh hnua lo kir ka ni a, tunah hian 100%-in ka la fit lo. Mahse theihtawp ka chhuah chhunzawm zel ang," a ti.
Mohun Bagan hian AFC Cup preliminary round khel turin January 28-ah Sri Lanka an pan ang a, Sri Lanka Premier League champion Colombo FC nen January 31-ah inkhelin February 4-ah Aizawl FC an mikhual ang.
Team Dinhmun
# Team Pld W D L GF GA GD Pts
1 Mohun Bagan 5 4 1 0 9 1 8 13
2 East Bengal 4 3 1 0 7 3 4 10
3 Aizawl FC 4 3 1 0 5 2 3 10
4 Bengaluru FC 4 3 0 1 9 2 7 9
5 Mumbai FC 4 2 0 2 3 5 -2 6
6 DSK Shivajians 5 1 2 2 4 4 0 5
7 Shillong Lajong 4 1 0 3 3 8 -5 3
8 Churchill Brothers 4 0 1 3 2 6 -4 1
9 Chennai City 4 0 1 3 1 6 -5 1
10 Minerva Punjab 4 0 1 3 1 7 -6 1