Indian Open neih theih beisei

Badminton Association of India (BAI) chuan season tharah Indian Open buatsaih theih ngei an tum a, sorkar laipui thuneitute hnenah ngenna siamin, ram dang aṭanga player lo kal turte khung hran hun chhung ti rei lo turin rawtna an thlen.

Coronavirus vangin infiamna khawvelin ngai a awh thei rih lo, India ramah pawh ram dang mi inkhel tura lo kalte chu ni 14 chhung khunghran hmasak tur an ni. Badminton player tam tak chuan hri leng leh inkharkhip vangin tournament an khelh tlem phah hle.

Nakkum March thla tawpa neih tur Indian Open-ah hian BAI chuan khawvel hmun hrang hrang aṭangin player tam thei ang ber inlan se an duh, chumi atan chuan inkahhruaina pawh thlah dul hret turin sorkar an ngen a ni.

BAI general secretary Ajay Singhania chuan, "Sports minister Kiren Rijiju ka hmu a, infiammite tana RT-PCR test leh inkhunghran chungchang kan sawi, kan duh leh beisei ang chu ti thei turah kan inngai," tiin sorkar lamin an thu thlente an phalsak ngei a ring.

Indian Open hi khelh theih a nih chuan Tokyo Olympic qualifying tournament zinga mi a ni dawn a, ram chhung player Sania Nehwal leh Kidambi Srikanth te tan ranking point hmuh belh theihna remchang a ni dawn.