EFL Cup Semifinal 2nd leg Wembley Stadium pan tur United?

Old Trafford-ah Manchester United-in Juan Mata leh Ma­rouane Fellaini te goal hmangin Hull City 2-0 in hneh tawh mah se, Wembley Stadium pan turin minute 90 khelh a la ṭul.

Zanin dar 1:15 hian KC Sta­dium-ah Tigers-in Jose Mourinho hote an mikhual dawn a, English Football Cup Semifinal second leg hi Ten 2-ah a en theih ang.

Mason-a tan

Hull City hian Ryan Mason chu Chelsea nen an inkhelh ṭumin a inhliam a, English midfielder hi a lu ruh a khik avangin an zaina hmun St Mary's Hospital, London-ah a la awm mek.

Tottenham Hotspurs aṭang­a Hull zawmtu Mason hi Tigers player manto ber a ni a, zanin pawh hian supporter-te'n mi­nute 25-naah (Mason-a jersey number) Ryan-a tan thawm neih an tum. Player-te pawhin warm up laiin 'Mason 25' tih chuanna T-shirt an ha bawk ang.

Beisei a tlem

Manchester United hi mi­nute 90 khelh hmabaka chak tura rinkai an ni a, final lut tura chak kher a ngaih tawh loh bawk avangin Hull City tan beisei tur a tlem tawh hle.

Tigers hian Liverpool-a hlawh­­chham Lazar Markovic chu loan hmangin Reds aṭangin an lalut a, Serbian winger Markovic hian Tigers a zawm hmain Sporting Lisbon-ah loan-in thla ruk chhung khel mah se league match vawi rukah goal khat chiah a khung.

Kum 22-a upa Markovic hi rinrawl a nih nghal a beiseiawm loh a, player pawimawh tur erawh Tom Huddlestone a ni. Spurs midfielder hlui Huddlestone chuan, "Hull City hian hun danglam tak kan tawng tawhṭhin a, United nen pawh hian kan beisei ngam tur a ni. A harsa dawn tih chu a chiang a, chutihrualin 10-15 a goal kan khung phawt chuan inkhel a danglam ang. Tute pawhin final kan luh an ring lo a, chuvangin pressure nei loin kan khel dawn," tiin beisei tur a awm thu a sawi.

Hull City hian coach thar Marco Silva hnuaiah match li an khel tawh a, vawi hnih chakin vawi hnih an chak lo. Premier League table hnuai lama awm result atan chuan a ṭha thawkhat hle.

Indah ṭhat hun

United hian Hull City hi Premier League-ah vawi kua an hmachhawn tawh a, vawi khat an draw tih loh chu an hneh vek. EFL Cup semifinal first leg-ah goal hniha an chak tawh bawk avangin Zlatan Ibrahimovic leh Paul Pogba te hahdamna hun pek an nih pawhin an mak lo ang.

Red Devils hian tun hmaa League Cup semifinal first leg an chak tawhna vawi thumah final an lut vek a, chung match-ah chuan Arsenal (1983), Leeds (1991) leh Sheffield Wednesday (1994) te an hneh. Manager Jose Mourinho pawhin Lea­gue Cup-ah record a nei ṭha a, Portuguese manager hian League Cup-ah hun pangngaiah hneh loh a tawng lo. Mourinho hian Chelsea a enkawl laiin Stoke leh Charlton chu penalty-ah a hneh lo a, extra time-ah Sunderland a hneh lo bawk.

Amaherawhchu Jose Mou­rinho hi vawi kaw chak zawn thei tia hriat an ni tawh lo a, Hull an hneh hnua an hmelma Liverpool leh Stoke City an draw avangin inchhuang tur an ni lo.

Manchester United mid­fielder Michael Carrick chuan, "Inkhel a la tawp lo tih kan chiang a, chuvangin inkhel hi 0-0 aṭanga bul ṭan tur angin kan hmachhawn ang. KC Stadium-a goal chhuah loh ringawt tum a him lo a, chuvangin chak tumin kan khel ang," tiin theihtawp chhuah a la ṭul zel thu a sawi.

English midfielder Carrick hi kum 35 ni tawh mah se tun season-ah a inlan ṭumin United-in chak loh an la neih loh avangin player pawimawh a ni. Veteran midfielder Carrick hi Stoke City an hmachhawn ṭumin a inlan lo a, Hull City hmachhawn turin rawlthar duhawm Marcus Rashford leh Anthony Martial te nen inkhel bul ṭan tura beisei an ni.

Hmabak

Manchester United hian Pa­thianni zanah Wigan Athle­tic chu FA Cup fourth round khel turin an mikhual dawn a, February 1 zanah Premier League-ah Hull City an mikhual lehnghal dawn.

Tigers hmabak a harsa dawn a, FA Cup-a Fulham an hmachhawn hnua league-a an khingpui turte chu United, Liverpool leh Arsenal te an ni.