Konta lakah Serena a hrang

Serena Williams chu world number 1 ni leh tur leh Grand Slam nomawi kawl hnem ber ni turin chak takin a kal zel. Nimin khan Australian Open hmeichhe quarterfinal khelh niin Serena hian Johanna Konta lakah 6-2, 6-3 in hnehna a chang.

Melbourne Park-a inkhelah kum 35-a upa Serena hian darkar khat leh minute 15 chhung lekin hnehna a chang. American star hian a service vawi khat hloh ve mah se Konta service vawi li lai a chhuhsak theih avangin semifinal lut turin harsatna a tawk lo - final lut tur chuan Mirjana Lucic-Baroni a paltlang leh a ngai ang.

Britain number 1 Konta hian Australian Open quarterfinal a khelh hma hian a zawnin match kua hnehna a chan bakah set 18 zet a la zawn a, a khelh ṭhat vanglai tawng mah se Serena lakah a ding chhuak zo chuang lo.

Kum 35-a upa Serena hi Melbourne-ah hian a vawi sarih nan a champion a nih chuan Angelique Kerber lehpelin WTA ranking-ah a chung berah a awm leh dawn a, Steffi Graf khumin Open Era bika Grand Slam nomawi chawi hnem ber a ni bawk ang.

Grand Slam vawi 22 champion tawh Serena chuan, "Konta hi player ṭha tak a ni a, hmachhawn pawh a hautak hle. Ka duh angin ka service a ṭha tawk lo a, chutihrualin lungngaihna tur erawh a awm lo," tiin a sawi.

Quarterfinal inkhel dangah world number 79 Lucic-Baroni chu mumang ramah a cheng chhunzawm zel. Plisokva hian kum 18 hnua a vawi khat nana major tournament-a a sang pali zinga tel turin seeded pangana Karolina Plisokva chu 6-4, 3-6, 6-4 in a hneh ve bawk.

Kum 34-a upa Baroni hian a naupan laiin Australian leh US Open junior-ah hlawhtlinna a lo chang tawh a, Martina Hingis nena ṭangdunin kum 1998 khan Australian Open doubles nomawi an lo chawi tawh bawk.