Chapecoense player-te an lo kir leh ta

November 29, 2016-a thlawh­theihna chetsual vanga player 19 zet chantu Chapecoense chuan chetsualna thlen hnua a vawi khat nan khelmualah an hmel an lan leh ta a, Brazil Serie A champion Palmeiras nen friendly match-ah 2-2 in an inhnehtawk.

Thlawhtheihna chesual aṭanga dam chhuak Chapecoense player pathum pawhin hlawhtlinna tam tak an lo chhar tawhna khelmualah an jersey nen an hmel an lan ve leh a, tun ṭum zet erawh a danglam ta.

Reserve goalkeeper Jackson Follmann chu wheelchair nen khel­mual chhungah nawr luh a ni a, hlim taka a lo inkhelh tawh ṭhinna khelmualah chuan 'ke bul' nichungin mittui nen a luh a ṭul ta si!

In tan Copa Sudamericana

Chape-in an chetsual vangin Copa Sudamericana final an khel thei lo a, an khingpui tur Atletico Nacional ngenna angin Europa League tlukpui inelnaah hian champion a puan an ni. Chape player dam chhuak zinga mi central defender Neto, left back Alan Ruschel leh goalkeeper Jackson Follmann te hnenah inkhelh hmain nomawi hlanna neih a ni a, mittui dang zo reng an awm lo.

Thlawhtheihna chetsual vanga nunna chan ta players, journalist leh club staff-te chhung koh chhuah an ni a, medal pek an ni bawk. A ṭhenin an pa, pasal, fapa leh unaupa te jersey hak ṭhin an rawn ha a, a ṭhenin an lem chuanna jersey an ha thung. Mittui dan sen a ni lo a, van lam hawia mittui luang ngiai ngiai hmuh tur an awm a, inpawm vawng vawng tawk lah bo lo - khawvel hi a chang chuan ava nunrawng ṭhin em!

Mi pali

Chapecoense player dam chhuak zingah he hun hmang tur hian chetsualna avanga a ke tan sak ngai Follmann chuan zing lamah damdawi in a chhuahsan a, Chapecoense goalkeeper hlui Nivaldo chuan khelmualah wheel chair nen a nawr lut - a dam chhung zawngin football a khel leh tawh dawn lo.

Kum 31-a upa Neto chu tun hnai lawkah khan tiang hawl loin a kal thei leh tawh a, Ruschel erawh a vannei fal a, May thlaah inkhel leh thei tura a dam hman beisei a ni - an chhiatna tawh dan ngaihtuah chuan 'thilmak' tih hi a sawifiah dan awlsam ber a ni.

Journalist dam chhuak zinga mi Rafael Henzel chuan an chetsual hnua a vawi khat nan Chape leh Palmeiras inkhelah hian com­mentary hna a thawk bawk.

Sulhnu hmunhlui

Chape defender Ruschel-a'n an chetsual hnua a vawi khat nan an khelmual a tlawh a, a tih hmasak ber chu an khelmual bula chhang dawr tlawh a ni. Kum 27-a upa defender chuan, "Ka kalna hmasa ber chu he thingpui dawr hi a ni. Zing takah kan thawh ṭhin avangin thil ei hman a ni lo a, he chhang siamna dawr hi kan pan nghal mai ṭhin a ni," a ti.

Ruschel chuan sawi chhun­zawmin, "Kan goalkeeper Danilo leh Follmann nen training zawh veleh he dawr hi kan pan ṭhin a, he hmun tlawh hmasak ber hi ka tan chuan bul ṭan dan duhawm a ni," a ti a, a chawlhpui ṭhin Danilo a awm tawh lo a, kalpui turin Follmann lah wheelchair a nawr ngai a ni tawh si.

Chape inlungrualna

"Vawiin hi ni lungchhiatthlak leh hrehawm tak a ni a, chutihrual erawh chuan heng mipui zozai hi kan lamah an ṭang tih kan hriatna a ni nghal bawk," tiin Dhayane Pallaoro chuan a sawi a, Dhayane hi club mipuiten an ngainat em em chetsualna a thi ve ta Chape president Sandro fapa a ni.

Kum 28-a upa Dhayane chuan sawi chhunzawmin, "Hetiang tak hian football chhungkua hi kan inlungrual ang tih hi kan lo suangtuah phak ngai lo. Ka theih­nghilh tawh ngai loh tur thil chu vawiina big screen-a ka pa thu­sawi kan en kha a ni. Chapecoense hi chhungkaw lian tak, thawmhnaw lakhawmtu aṭanga president thlenga intluktlanna hmun a nih thu a sawi ṭhin," a ti.

"Duhthusam ropui tak an nei a, vawiinah chuan Chapecoense hi club lian tak a ni tawh. Engtikahmah kan hmangaih kaltate kha theihnghilh an nih loh kan beisei tlat a ni," tiin a sawi bawk.

Journalist nunna chan zinga mi nu pakhat chuan a fapa duhthusam chu Chapecoense club chanchin ziah a nih thu a sawi a, "An tan a nung a, an kiangah a chawl ve ta a ni," a ti.

Inkhel chu

Inkhel hamrik ham a ni a, Chape khelmual Arena Conda chu banner, flag leh ribbon hring leh varin a khat vek a, mipui an zai rual dual dual a, 'kumkhaw champion' an nih thu chu an hla sak nin theih loh a ni.

Arena Conda-ah mittui luang a reh thei lo a, zaithawm a reh hek lo. Chape chherchhuah leh Arena Conda-a seilian Douglas Grolli hmel hmuh tur a awm a, he central defender hian a club Cruzeiro hnenah amah siam liantu club 'pui' tura chhuahtir turin a dil a, a dilna phalsak a nih hnua a tih hmasak ber chu Chape tana goal khung a ni.

Minute 71-naah inkhel tihtawp lailawk a ni a, thlawhtheihna che­­suala nunna chan ta mi 71 te hriatreng nan mipui zawng zawngin ding chungin kut an beng a, November 29, 2016-a thil ropui beiseia zin chhuak, kir leh ta lo te kha khawvelin a hre reng.