Hammers-in Marseille dilna hnawl zel
West Ham chuan Marseille-in Dimitri Payet lei an dilna chu a vawi thum nan an hnawl niin Sky Sports-in a tarlang. Sky thuchhuah hi a dik a nih chuan London club hian Ligue 1 club-in pound maktaduai 22.5 pawhin French midfielder hi an la chhuah phal lo tihna a ni.
Hammers hian an player chhuanvawr hi pound maktaduai 30 an chhiar niin an sawi a, amaherawhchu chhungkaw harsatna avanga inlan duh tawh lo Payet hi London club hian chhuah mai se tih hi football expert-te ngaihdan a ni.
French midfielder hian kum 2015 nipui khan pound maktaduai 10.75-in Marseille aṭangin Hammers hi a zawm a, nikum February thla khan kum 2021 thleng cham turin Payet hian a contract a pawtsei bawk. West Ham tana match 60 inlana goal 15 khung tawhtu midfielder hian training a ṭhulh chuang lo a, Hammers U23 team zingah training a nei mek.
West Ham hian Payet-a awm loh hnuah Crystal Palace leh Middlesbrough an hneh a, an khingpui leh tur chu French midfielder tel chunga 5-0 laia an hneh loh Manchester City a ni.
Hammers player hlui Robbie Keane chuan, "Club tana ṭha ber chu Payet hralh chhuah a, pawisa hmuh bawk a ni. Player ṭha bik a ni tih chu a chiang a, amaherawhchu a chhuah tur thu a sawi hnuah an khel ṭha a ni. Payet awm lo hian player-te'n mawhphurhna an ngah sawt tih an hria a, an thawkrim sawt bawk. Hetia club chhuahsan duh awm hi chuan club hmangaihtu tak tak an lawm lo ṭhin a, club legend Mark Noble te ang chi phei chu Payet-a chunga an rilru put hmang a dang tawh ngei ang," tiin French midfielder chu chhuak se London club-in an ṭhat pui zawk a rin thu a sawi.
West Ham hian February 11-a West Brom an hmachhawn zawhah Dubai-ah training neih an tum a, French midfielder Payet hi Hammers player a la ni a nih pawhin United Arab Emirates-a a zin ve a rem dawn lo niin tarlan a ni. Hammers fa chuam ni ṭhin Payet hi coach Bilic leh a teammate-te'n senior team-a a tel ve an rem ti tawh lo!