Champion lai Ivory Coast an tla

Africa Cup of Nations khelh mekah champion nomawi kawltu Ivory Coast chu group stage paltlang zo loin an tla! Thawhlehni zan khan Morocco chuan Rachid Alioui goal khat khung hmangin Ivory Coast hi 1-0 in an hneh a, point ruk hmuin quarterfinal an inhlangkai thung.

Group C inkhel dangah DR Congo chuan group hma­hruaitu an nihna tichiang nawn turin Togo chu 3-1 in an hneh. Congo tan forward Junior Kabananga chuan goal hmahruai a khung leh a, inelna neih mekah goal thum nei tawhin ani aia khung tam an awm lo. Chancel Mbemba leh Paul-Jose M'Poku ten goal khung ve lehin harsatna nei loin hnehna an chang a, point sarih an hmu.

Morocco hian quarterfinal-ah chuan Group D hmahruaitu an hmachhawn dawn a, Congo hian pahnihna an hmachhawn thung ang - Group D aṭang hian Mali, Ghana leh Egypt te an la tlang thei vek. Kumin Africa Cup of Nations-ah hian Burkina Faso, Tunisia, Senegal, Cameroon leh Ghana te chuan knockout round an lut tawh a, a thlengtu Gabon chu a tla langsar zinga mi an ni.

Elephants an ral

Ivory Coast tan Premier League-a player langsar ni phak Wilfried Zaha leh Eric Bailly te an inlan a, beisei angin an langsar lo. Elephants hian an match hmasa berah Arsenal striker hlui Emmanuel Adebayor telna Togo chu goal awm loin an inhnehtawk pui a, an match hnihnaah DR Congo chu 2-2 in an inhenhtawk pui leh bawk.

An match hnuhnung ber­ah hnehna chan ngei ngei a ngai chungin Morocco an hma­chhawn a, ball possession pawh 66% zet changin inkhel an thunun hneh hle a, goal khung tumin vawi 11 zet an pet bawk. Mahse, an mamawh leh a pawimawh ber goal an nei thei lo.

Crystal Palace winger Zaha chuan yard 12 leka hla aṭangin a hun ṭha neih a chhawr ṭangkai thei lo a, Chelsea striker hlui Salomon Kalou chuan chep tak aṭangin a tauh goal teuh hle a, goal ban hrulah uiawm takin a thamral ve bawk.

Ivory Coast hian tun hnai Africa Cup of Nations an khelh hnuhnung parukah group stage an paltlang vek a, knock out round an luh zawh loh hnuhnung ber chu kum 2002 daih tawh kha a ni. Egypt anga a zawna vawi thum champion thei nomawi hum him zawn thei nih an tumna chu a thlawn ta rih a ni.

Hetih lai hian Morocco erawh AFCON an khelh hnu­hnung vawi sarih aṭanga quarterfinal an luh lehna hmasa ber a ni thung a, kum 2004 khan pahnihna an lo ni tawh a ni.