A ṭha zual zingah ka la tel lo - Thiem

Dominic Thiem chuan tennis player ropuite huangah a la awm ve loh thu a sawi a, chutihrualin a ṭha bikte hmachhawn chu nuam a tih thu a sawi tel bawk.

Roger Federer, Rafael Nadal leh Novak Djokovic ten inelna an thunun a, midang tan hmun awl an siamsak meuh lo. Anni pathum el ve phak ber Andy Murray chu hliam vangin hun rei tak a inkhel mumal thei tawh lo.

Austrian tlangval Thiem hi player ṭhate elphak ber tura ngaih a ni. US Open nomawi a chawi hnuah phei chuan mi tam takin beisei an nei sang a, chutih rualin kawng thui tak zawh tur a la nei tih a inhria.

Kum 27 mi Thiem chuan, "Grand Slam leh 1000 Masters title pakhat ve ve ka nei a ni mai a, anni ho nen a khaikhin chi chu ka la ni lo. Chutihrualin player ropui bikte ka hmachhawn thei ṭhin hi ka lawm, nuam pawh ka ti hle.

"Roger, Rafa leh Novak te nen kan hun tawn a inrual avangin vanduai anga inngaih chang a awm thei. Amaherawhchu chutiang a ni ngawt lo, anni nena kan inkhel thei hi kan vannei zawk hle a ni, a ṭha ber hmachhawn theih aia hlu a awm chuang lo," a ti.

Thiem hian French Open final vawi hnih a khelh tawhah Nadal a ngam lo, mahse Spanish tlangval hi ATP Finals khelh zawh takah khan a hneh. Australian Open final-a a hneh loh Djokovic pawh O2 Arena a inelna neihnaah a hneh thei tawh.

Federer, Nadal leh Djokovic te awm laia number 1 ni thei awmchhun chu Murray chiah a ni a, Britain tlangval hnungzuiin season tharah Thiem hian ranking lamah pawh chungnung ber nih a tum ngam ang.