Inter leh Real an buk dawn

Champions League khelh mekah group B hi a ngaihnawm ber hial ang. European football-a inelna sang bera record nei ṭha ber Real Madrid chu tla thei dinhmunah an ding, season liam taa Europa League finalist Inter Milan dinhmun a la derthawng zawk. 

Zanin dar 1:30 hian Inter Milan-in San Siro-ah Real Madrid an mikhual dawn. Group B-ah Italian club hi table mawngphahah an awm a, Los Blancos hi pathumnaah an awm. 

Borussia Monchengladbach leh Shakhtar Donetsk te zanin dar 11:25-ah an inkhel dawn a, team nem zawka ngaih pahnihte hi pakhatna leh pahnihna dinhmun luah mektute an ni.

Group B team palite hi knockout stage lut thei leh tla thei vek an ni a, zaninah hian engmah a la chiang dawn lo. Hmahruaitu Gladbach (5 pts) leh table mawngphaha awm Nerazzurri (2 pts) inthlauhna hi point thum chauh a ni a, beisei tur an la nei vek.

Real Madrid hian Champions League nomawi vawi 13 an chawi tawh a, tuna manager ni lai Zinedine Zidane-a ho hian kum 2016 aṭanga 2018 chhung kha a zawnin an champion. French manager hoa an an hlawhtlinna ringawt hi zanina an khingpui tur Inter Milan nen a intluk tawk.

Los Blancos ropuina aṭanga tehin Inter hi hlawhtlinna hi nep deuhin lang mah se Champions League-a vawi thum champion hi thil namai a ni lo. Premier League history-a club ropui lawrlak Manchester United pawh vawi thum chauh an champion a, Serie A-a sulhnu ṭha ber Juventus pawh vawi hnih chauh an champion.

Zanina inlan tur club pahnih te hi an sulhnu thlirin club ropui an ni a, inelna ṭan hmain group B patlang tura ngaih pahnih an ni. Amaherawhchu tuna a lan dan chuan pakhat zawk hi an tlak a rinawm a, hemi a nih avang hian zanin inkhel tur hi a pawimawh hle.

Real Madrid chuan Thawhṭanni khan Italy-a zin tur player 21 an tar chhuak a, striker chhuanvawr Karim Benzema leh captain Sergio Ramos bakah midfielder Federico Valverde te an tel dawn lo. 

French forward Benzema hi November 8-a Valencia an hneh loh ṭumin an inhliam a, Ramos erawh ram tana fehchhuahnaah Spain-in Germany 6-0 zeta an sawp ṭumin a malpui a ti na thung. 

Benzema bakah hian forward Luka Jovic leh defender Eder Militao te chu Covid-19 positive vangin a tel thei dawn lo a, squad-ah Hugo Duro dah tel a ni. Spanish striker Duro hi kum 21 mi chauh a ni a, feet ruka sang niin Getafe aṭanga lakluh a ni a, inchher hriam turin Real Madrid B-ah a awm.

Real tana chanchin lawmawm erawh Casemiro a tel dawn. Brazilian midfielder hi international break hmain Covid-19 positive vangin khung hran a ni a, tunah chuan inelna hmachhawn turin a inpeih tawh.

Inter pawhin coronavirus hri kai vangin Aleksandar Kolarov, Marcelo Brozovic leh Daniele Padelli te an hmang thei dawn lo a, an ṭhat theih dan berin an inlan thei dawn lo.

November thla tirah Real Madrid-in Inter Milan hi an mualah 3-2 in an hneh hram. Spanish club hian Italian club an hmachhawn hma hian Shakhtar Donetsk 3-2 in an hneh lo a, injury time-a Casemiro goal hmangin Borussia Monchengladbach nen 2-2 in an inhnehtawk.

Inter Milan pawhin team nem zawka ngaih Gladbach (2-2) leh Shakhtar (0-0) lakah point hnih chauh an hlawh chhuak a, hemi a nih avang hian zanina inkhel tur hi a pawimawh phah hle. Real Madrid hian Inter nena an hmachhawn hnuah Valencia 4-1 in an hneh lo a, an match hnuhnung berah Villarreal nen 1-1 in an inhnehtawk. 

Zidane hian Real manager a nih hnua La Liga vawi hnih leh Champions League vawi thum a chawi pui tawh a, amaherawhchu tun hnai result avangin a dinhmun a him lo. Inter Milan manager Antonio Conte pawhin player a la lut tam a, UCL-a an dinhmun chhiat bakah Serie A-ah panganaah an awm mek.

Inter hian Real Madrid an hma-chhawn hnuhnung paliah vawi khat chauh an hneh a, Conte-a'n ruahmanna ṭha a neih a ṭul. Defender pawimawh pahnih Milan Skriniar leh Stefan de Vrij te an rawn kir a rinawm a, chutihrualin ram tana che ṭha Christian Eriksen dinhmun hriatthiam a har.

Eriksen hi kartawpa Torino an hneh ṭumin a khel lo a, Inter Milan chief executive Giuseppe Marotta chuan January thlaa a chhuah theih thu a sawi. Real Madrid nena an inkhelh turah Torino nena goal khungtu Romelu Lukaku, Lautaro Martinez leh Alexis Sanchez te an pawimawh ang.