Kar hnih chawl tur Ibrahimovic

Zlatan Ibrahimovic chu a malpui hliam vangin a inkhel thei rih dawn lo. AC Milan thupuangtu chuan an striker palian hi kar hnih vel a chawlh tur thu a sawi a, chu aia rei pawh a ni thut thei niin a sawi bawk.

Kum 39 mi Ibra hian kar tawp Serie A inkhelah goal hnih khungin Napoli lakah a team 3-1 in hnehna a chanpui. Milan hian league bikah tun hnai season 10 chhunga a vawi khat nan Naples khawpuiah hnehna an chang ve chiah.

Goal hnih a khung hnuah Ibra hi hliam vanga lak chhuah a ngai a, a dinhmun endik niin nimin khan a chawlh tur thu hi an puang. Swede striker hian Serie A bakah Europa League group match a khel thei dawn lo tihna a ni.

Ibra hian tun season Serie A match ruk a khelh aṭangin goal 10 a khung tawh a, ani aia khung hnem an awm lo - a hnuaiah hian goal riat khungtu Cristiano Ronaldo a awm, a chawl tur hi Milan tan channa lian tak a ni ang.

Milan hian Serie A match riat khelh tawh chinah point 20 an hmu a, a chung berah an awm. Season kua ngawt a zawna champion tawh Juventus rorelna chu tih tawp tumin hmalam an pan mek.