Final-ah kum 35 mi Federer

Grand Slam nomawi vawi 17 chawi tawh Roger Federer-a'n nomawi dang pakhat lak belh turin vawi khat chak bak a mamawh tawh lo. Kum 35-a upa Federer hian nimin tlai khan seeded palina Stan Wawrinka chu darkar thum leh minute li chhungin 7-5, 6-3, 1-6, 4-6, 6-3 in a hneh.

Khawvela tennis player piang tawh zinga thiam bera mi tam takin an ngaih Federer hian Australian Open nomawi vawi li a chawi tawh a, vawi nga chawi tur chuan vawiin tlaia Rafael Nadal leh Grigor Dimitrov te inkhela chak zawk a hneh a ngai dawn a ni.

Rod Laver Arena-a inkhelah Federer-a'n a service hmasa a, Waw­rinka service vawi khat chhuhsakin minute 50 chhungin set khatna a la nghal. Set hnihnaah pawh Federer-a'n a service hum tluanin harsatna a la tawk lo.

Set thumnaah Grand Salam vawi thum champion tawh Wawrinka a tho chhuak, awlsam takin 6-1 in set a la a, a khelh ṭhat tluan lai chhunzawmin set thumna la tur pawhin buaina a tawk bik lo. Set hnuhnung berah erawh Federer-a'n a tawnhriat ngah tawh a chhawr ṭang kai, service hmasa zawkin 4-2 a hma a hruai hnuah Wawrinka service a chhuhsak a, harsa lo takin a chak tlang.

Player pahnihte hi vawi 22 an intawnna a ni a, a upa zawk Federer-a'n vawi 19 hnehna changin record a nei ṭha zawk. Hard court bika an intawn hnuhnung 14-ah Federer hian hnehna a chang vek.

Grand Slam inelna bikah chuan kum 1974 US Open-ah khan kum 39-a upa Ken Rosewall-a'n final a lo khel tawh a, Australian tlangval Rosewall tih lohah chuan Federer hi major tournament final khel thei upa ber a ni ang.

Swiss thiampuipa hi nikum khan a khum hliam vangin Wimbledon hnuah a inkhel tawh lo a, hei hi hun rei zawk inkhelh theih a duh vang a ni. A hliam dam hnua a tournament khelh hmasak berah Federer-a'n final a lut leh nghal.

Federer-a'n tun hmain amah aia tawnhriat nei tlem zawk Wawrinka hian a thurawn a pawm thiam ṭhin thu leh hma a sawn thu a lo sawi tawh. An khelh dan phung enin Wawrinka-a'n a khawvela ṭha ber tia a sawi ṭhin Federer khelh dan a entawn tih a hriat a, chutihrualin player ṭha tawk tak ni ve mah se a hnampuipa theihna leh thiamna anga sang a nei ve lo thung.

Kum 35-a upa Roger Federer chuan, "Break point ka pumpelh zat pawh ka chhiar thei lo, a harsa a ni. Baseline-ah khan Stan kha a chungnung a, ka hriat avangin ka nawr chhunzawm a, vanneihthlak takin a service ka laksak thei hlauh bawk. Tuna ka awm dan aia hlim hi ka nei lo ang, mak ka ti khan scoreboard ka en nawn leh ngat a ni. Ka mumang lamah pawh kum upat lamah hetianga thui hi ka thlen phak ka beisei lo a, ka hlim tak zet a ni," tiin nomawi vawi tam chawi tawh mah se final a luh avangin a lawm thiam hle.

Nadal a tlang dawn?
Nikum Australian Open first round-ah Rafael Nadal a tla a, Spain tlangval hi a kum a tam ve deuh tawh avangin Melbourne-ah hian ropui takin a inlan leh thei ang em tih chu tennis ngaina tute zawhna awm lian tak pakhat a ni.

Kum 30-a upa Nadal hi season hmasa khan banrek na vangin a inkhel mumal thei lo a, kuminah erawh a hliam a dam chiang tawh. Grand Slam vawi 14 champion tawh Nadal hian Nilaini tlai khan Milos Raonic hnehin a vawi 24 nan Grand Slam semifinal a lut - vawiin chawhnu dar 2:00-ah Grigor Dimitrov nen final hmunruak pakhat an inchuh dawn.