Marseille player thar Evra
Juventus defender Patrice Evra chuan Italian champion chhuahsanin Marseille chu free transfer-in a zawm a, French defender hian Ligue 1 club tan thla 18 chhung khel turin contract a ziak.
France tana vawi 81 inlan tawh Evra hian Juventus-ah thla ruk contract la nei mah se Turin club hian inhriatthiam tawnnain an chhuahtir a, tun season-ah match thum chiah a la inlan sak a ni.
Manchester United defender hlui hi Ligue 1 lamah a mikhual hran lo a, kum 2006 nipui transfer-a United a zawm hma khan Monaco tan 2002-2006 season chhung khan a khel tawh.
Juventus coach Massimiliano Allegri chuan, "Evra hian season hnih leh a chanve chhung hun duhawm tak kan hnenah a hmang a, player ṭha leh ropui tak a nih avangin kan chhuahtir mai a ṭul ta hian min ti hnual takzet a ni. United tan kum 10 a khelh hnuah kan hnenah lokalin player pawimawh pawl a ni leh thei a ni," tiin a player chu a thlah.
Evra hian a career-ah Champions League final vawi nga khel tawhin United tana a khelh lai 2008 khan a champion tawh a, Premier League nomawi vawi nga chawi tawhin Juventus-ah Serie A nomawi vawi hnih a chawi bawk.