Bolt-a Olympic gold medal an hlihsak
Khawvela tlan chak ber Usain Bolt-a'n Olympic vawi thum a inlan aṭangin gold medal pakua a la thei a, heng zinga pakhat chu laklet sak a ni!
Beijing Olympic-ah khan Bolt-a telna Jamaican team chuan 4x100m intlansiakah gold medal an la, an zinga tel ve pakhat Nesta Carter chu International Olympic Committee (IOC) in nikum a infiammi 454 endik nawn tura a tih zingah a tel a, damdawi hman phal loh 'methylhexaneamine' a lo hmang tih hmuh chhuah a ni - amah chauh ni loin a teammate dang pathum ten an tawrh ve phah.
Kum 31-a upa Carter hi vawi duai lo Jamaica tan a lo inlan tawh ṭhin a, kum 2008 Beijing Olympic-ah khan Michael Frater, Asafa Powell leh Bolt te nen team khatah awmin a tlan hmasa ber; Jamaican team hian 4x100m chu 37.10 seconds chhunga tlan thlengin world record an siam a, hemi ṭuma an hneh tak Trinidad and Tobago leh Japan te chu medal hlan leh hnuhnawh theih an ni ang.
London Olympic-ah pawh Carter hi inlan zuiin an hlawhtling leh a, kum 2011, 2013 leh 2015 te khan World Athletics Championship-ah an ram chu a lo champion pui tawh bawk. Jamaican sprinter ropui Bolt chuan thil thleng chungchangah hian thu thar a la nei lo a, mah se nikum June thla khan an team zinga endik ngai an awm chungchanga hi a lo sawi tawh.
Kum 30-a upa Bolt chuan, "Kum li chhung rim takin gold medal la ngei turin kan thawkrim a, chanchin lawmawm loh hriat tur a awm hi a lungchhiat thlak takzet. Hringnunah hian thil chi hrang hrang a rawn thleng ṭhin a, a ṭul a nih chuan ka medal pawh ka dah let mai ang, ka tan buaina tur a awm lo," tiin a lo sawi tawh.