Footballer zinga mi bik Rooney

Khawvelin Wayne Rooney a hriat ṭan aṭangin kum 10 chuang a vei t awh a, English striker hian goal khung a la bansan lo. Rooney hian January 21 zan khan Stoke City lakah freekick mawi tak a khung a, United tan goal 250 khungin English club ropui tana goal khung tam ber a ni. The Special One tia inchhal ngam Jose Mourinho chuan, "Wayne Rooney hi Manchester United legend a ni," tiin a sawi a, football tuipui chin chuan Portuguese manager thusawi hi 'ni rawh se' tiin an chhawn ngei ang.

Legend tura duan

October 24, 1985 khan Croxteth, Liverpool-ah Rooney hi a piang a, an khuaa club lian zawk Liverpool hawisanin Everton ṭanin a sei lian a, Toffees hi kum kua leka upa a nihin a zawm. Kum 11 leka upa a nihin Merseyside derby-ah Everton mascot a ni a, United jersey a hak hma aṭang tawhin Reds mil lo tura chawm len a ni.

Rooney hian 2002-ah Everton hi FA Youth Cup final a thlenpui a, kum 17 tling lo mah se season tharah senior team zingah telh a ni. August 17, 2002 a Tottenham an hmachhawn ṭumin a vawi khat nan bul a ṭan a, Mark Pembridge goal khung tur siam sakin 2-2 in an inhnehtawk. October 2, 2002 khan Everton club tana a goal hmasa ber a khung a, League Cup second round-ah Wrexham 3-0 a hnehin hetih hunlaia Toffees tana goal khung thei naupang ber a ni.

Khawvel hriat a hlawh ṭanna tak erawh October 19 , 2002 a ni. Rooney hian kum 17 tlin nan ni nga a la mamawh tihin Everton-in an mual Goodison Park-ah match 30 chhung hneh loh tawng tawh lo Arsenal an mikhual a, minute 80-naah Rooney hian khelmual rawn rapin minute 10 hnuah goal ropui a khung a, chakna goal a nih bakah a hun laia Premier League-a goal khung thei naupang ber a ni.

Hetihlai hian Rooney hi kum 16 leka upa a ni a, contract puitling a la ziah loh avangin kar khatah pound 80 lek a hlawh. Arsenal manager Arsene Wenger chuan, "England-a hna ka thawh ṭan hnua talent nei ṭha ber a ni," tiin Rooney a fak.

Rooney hi Wenger-a tan mang­chhe thlentu a ni zui zel a, 2004 khan Arsenal match 49 hneh loh nei loa kaltluang a titawp. English striker hian pound maktaduai 25.6 in Manchester United a zawm a, Arsenal ngamtu leh Liverpool nena inhal a nih miau avangin United jersey pawh a mawi pui nghal hle.

Hattrick nen

Rooney hian United tana a khelh ṭan hian jersey no. 8 a ha a, Red Devils tana a inlan hmasak ber chu September 28, 2004 daih tawh kha a ni a, UEFA Champions League-a Fenerbahce 6-2 a an sawp ṭumin hattrick a siam nghal.

G0oal 250 khung tur hian Rooney-a'n match 546 a mamawh a, a goal zingah hian goal mawi bik tia sawi tur pawh a nual. February 12, 2011 khan Rooney-a'n United hmelma Manchester City lakah 'overhead kick'-in chakna goal a khung a, Old Trafford-a English striker goal hi chu kum khaw sawi a tling ngei ang.

Mi bik a ni

• United tana goal khung tam ber Rooney aia Red Devils tana khel tam chu Ryan Giggs, Charlton, Gary Neville leh Paul Scholes te chiah an ni.

• Rooney hian United tana a season khatnaah match 43 inlanin goal 17 a khung nghal a, 2005 PFA Young Player of the Year dawngin season lehah pawh he chawimawina hi a dawng nawn.

• English striker hian United hi Premier League nomawi vawi nga, Champions League nomawi vawi khat, FA Cup vawi khat, Football League Cup vawi khat leh FIFA Club World Cup vawi khat a champion pui tawh.

• United captain hian ram tan goal 53 a khung tawh a, England tana goal khung tam ber a ni.

• England captain Rooney hi ram tan vawi 119 a inlan tawh a, khelh tam lamah goalkeeper Peter Shilton chiah a tluk lo.

A daih rei ang - Sir Alex

Manchester United mai pawh ni lo, football history-a manager ropui ber zinga mi Sir Alex Ferguson-a'n Everton aṭanga a thlem chhuah Rooney goal khung tam record hlut zia a hrechiang a, ropui a ti tel bawk.

Kum 75-a upa Sir Alex chuan, "Sir Bobby record hian kum 44 a daih a, Rooney-a'n United a zawm khan he record hi a khum ang tih hi ka ngaihtuah pha lo. Rooney hlawhtlinna hi a ropui a, a ropuina belhchhahtu chu match 200 vel zetin a khel tlem zawk bawk," tiin goal khung thei Rooney a fak.

United manager Jose Mourinho chuan, "Marcus hi kum 19 leka upa la ni a, football career zawng zawng United tana a khelh chuan Rooney record hi a la tluk pha thei mahna," tiin Manchester khaw tlangval chuan captain Rooney record a khum theih a beisei thu a sawi.

Amaherawhchu Sir Alex chuan, "Tunlai hunah chuan player pakhatin club pakhata kum 10 khelh hi a harsa tawh a ni. Jose hian Marcus Rashford hi Rooney anga hma a sawn chhoh a, United-a a cham bawk chuan record a khum theih a beisei a. Kei chuan ka huphurh pui hle," tiin Rooney record-in a daih rei a rin thu a sawi.

Engtin zel?

United record siamtu Rooney chuan, "Ka tan chuan chawimawina hlu bik a ni a, ka hlawhtlinna hi ka chhuang a ni. Stoke City laka ka goal khung chauh ni loin United tana ka goal hmasa ber leh goal dang zawng zawng kha tun hun ka thlen theihna chhan a ni," tiin record a siam theih avanga a lawm thu a sawi.

United hi khawvel player ṭha ber ang hiala chhal theih Cristiano Ronaldo bakah player ropui Eric Cantona, George Best, Denis Law leh player ṭha bik khelh tawhna a nih avangin Rooney record hi sawi hnawm theih a ni lo.

United manager Jose Mourinho chuan, "Wayne Rooney hi Manchester United legend a ni a, English football history-ah legend a ni. Tunah chuan a kutah record a awm tawh bawk a, mi pangngai anga awm leh turin ka duh a, goal khung chhunzawm zel turin ka duh bawk," tiin a captain a fuih. Portuguese manager hian Chelsea a enkawl laiin Rooney hi lakluh a tum tawh a, United a enkawl ṭantirhin English striker hian sawisel hlawh mah se captain atana a ruat striker hi a chhan tlat.

Sir Bobby Charlton chuan, "Ka record ka chan ta hi pawi ka ti lo ka tih chuan dawt sawi ka ni ang a, chutihrualin Wayne hi ka lawmpui a ni. History lehkhabu ziahnaa a hming chuan hi a phu a ni," tiin United legend chuan Rooney a lawmpui thu a sawi.

Rooney - United Record
Goals 250
Match mamawh zat 546
Goal khungna match zat 189
Team score-na zat 58
Goal khungna hmun
6 yard box 49
18 yard box 165
Box pawn 36
Engtin nge a tih goal
Head 30
Ke vei lam 27
Ke ding lam 193
Goal khung dan
Shot 155
Header 30
Penalty 26
Volley 18
Freekick 7
Lob 4
Chip 4
Indirect Freekick 2
Overhead kick 2
Backheel 1
Deflection 1
Khingpui ngam zawng
Goal khung tamna club Aston Villa 14
Manager khung tamna Arsene Wenger 12
Goalkeeper score tam berna Mark Schwarzer 12
Khualmuala a khung tamna St James Park 8
Giggsy nge nge
Rooney khung tur siam sak tam ber Ryan Giggs (18)
Goal khungna hmun
Old Trafford 134
Khualmualah 106
Neutral Ground 10