Liverpool vullai a chuai

"Wembley-ah hian vawi khat chu ka kal ve tawh a, chu pawh France-in England an hnehlai en tur ringawtin a ni. Mahse, tunah chuan EFL Cup final khel turin ka kal dawn ta, nomawi chawi ngei turin ka kal dawn a ni," tiin Southampton-in Liverpool an hneh hnu lawkah Saints manager Claude Puel chuan a sawi - Anfield-a Liverpool ngamtu manager hi a hlim.

Nilaini zan khan EFL Cup semifinal second leg-ah Liverpool chuan Southampton an mikhual a, St. Mary's-a an ngam loh tawh team hi an buzawlah meuh pawh an ngam chuang lo - injury time a Shane Long goal khung hmangin Saints an chak a, inkhel pahnih belhkhawma an chakna zat chu 2-0 a ni. Kum 1979 hnua a vawi khat nan League Cup final an lut ve leh ta.

Saints an hmuhnawm

Southampton-in semifinal-a Liverpool an hmachhawn dawn khan Saints manager Puel chuan, "Mi tupawhin chak lo tur zawkah min dah vek a, mah se football-ah chuan eng pawh thleng thei a ni," tiin a sawi a, French manager huaisenna hi khelmual chhungah a nauten an chhawm.

Semifinal first leg-ah chak phu zawk nichungin hnehna an chang a, Anfield-ah pawh a danglam chuang lo. Saints hian defender pawimawh Virgil van Dijk chu hliam vangin chhawr thei lo mah se an buai phah lo a, midfield-a roreltu Oriol Romeu chu Liverpool goal nawr tur dang chattu a ni.

Saints-in 27% lek ball an chang chungin 1-0 aia tam zawka chak thei an ni a, Dusan Tadic-a'n hnai set sawt aṭanga a pet chu Reds keeper Loris Karius-a'n ṭha zetin a dan sak a, captain Steve Davis chuan a hun ṭha neih chu goal pawn lama ball thlawh nan a hmang thung.

Southampton hi buai lo tawp erawh an ni bik lo. Emre Can goal shot vanga goalkeeper Fraser Forster-a chetsual hnua line aṭanga ball a beng chhuak leh hman chu vanneih vang tih loh rual a ni lo a, goal khungtu Long-a handball vang leh substitute Divock Origi tih tluk vanga Jack Stephens ten penalty an chawi lo chu an vanneihpui bawk.

Liverpool an pul

Season ṭantira team hmuh­nawm chu Liverpool an ni a, an tlarhma hmuhnawm tak chu mite fak rawn an ni. Mahse, Jurgen Klopp-a naute hian match an khel tam tawlh tawlh a, an thiam lo tawlh tawlh ni maiin a lang! Reds hian inelna hrang hranga an match hnuhnung pasarihah vawi khat chiah chak hmel an hmu a, hnehna an chan awmchhun lah FA Cup replay-a League Two club Plymouth Argyle an hneh kha a ni - inchhuanna tur an nei lo.

Reds hian pound maktaduai 34 man Sadio Mane awm lo an tuar tih hai rual a ni lo a, Senegal tana Africa Cup of Nations khela zinchhuak mek winger hi an ngai tawh khawp ang. Daniel Sturridge-a'n a thiamna angin a khel chhuak lo a, English striker hian 'ama class' ngaihtuaha mawi lo khawpin chance ṭha vawi hnih a khawhral a, substitute Origi-a'n inrintawkna a nei lo tih hmuh hmaih rual a ni lo bawk.

Jurgen Klopp-a'n midfield-ah Emre Can leh Jordan Henderson khelhdun tirin Georginio Wij­naldum chu bench lamah dah a ni a, German coach-in thutlukna a siam sual chiang hle.

Vanduai inti Klopp

Liverpool manager Jurgen Klopp chuan, "Vawi hnih kan inkhelhah an chak zawk ve ve a, Saints khan final luh an phu a ni. Kan khel ṭha a, ka ngaihdanah chuan chance ṭha bik vawi sarih lai kan nei a, khatiangah chuan goal khung tur kan nihlaiin kan khung lo miau a, kan tlawm ta a ni. Kan khelh danah ka lawm a, result-ah erawh lawmna tur a awm lo," a ti.

Klopp chuan sawi chhun­zawm­in, "Forster khan engtinnge goal line aṭangin ball kha a ben chhuah leh theih zawk? A thiam rualin vanneihna a keng tel a ni. Shane Long kha chiang takin a handball a, referee-in a hmu miau bawk si lo," tiin an vanduai thu a sawi.

Southampton manager Claude Puel chuan, "Ka naute ka lawmpui takzet a, zaninah hian an thawhrim rah an hmu a ni. Wembley-a final khel phak tur chuan kalkawng a hautak em em a, inkhel pahnih kha kan thlirlet chuan chak kan phu zawk a ni," tiin final luh phu zawkin Wembley an pan tur thu a sawi.

Inkhel chhehvel
Jurgen Klopp-a'n manager hna a chelh hnuah a vawi khat nan semifinal-ah a tlawm a, semifinal a luh hmasak parukah final a lut vek.
Southampton-in goal chhuah nei miah loin EFL Cup final an lut
Liverpool-in tun season-ah Saints vawi thum an hmachhawn tawh a, goal an khung lo vek.
Claude Puel-a'n Reds a hmachhawn vawi rukah vawi thum hnehna changin vawi thum a inhnehtawkpui a, a la tlawm lo.
Liverpool-in semifinal an khelh tawha first leg leh second leg-a goal an khung loh hnuhnung ber chu 1970-71 Fairs Cup-a Leeds United an hmachhawn kha a ni.
Saints-in major trophy an chawi hnuhnun ber chu kum 1976 FA Cup final-a Manchester United an hneh kha a ni.
Liverpool-in 73% ball possession an nei a, goal-ah vawi 13 shot neiin target-a shot an neih zat erawh vawi thum chauh a ni thung.