Nomawi inchuh tur Williams vs Williams

Venus leh Serena Williams te chuan nimin khan Australian Open semifinal an paltlang a, Williams unau hi Grand Slam final-a a vawi kua nan an intawng dawn. Final hi Inrinni tlai dar 2:00-ah khelh tur a ni ang.

Melbourne Park-a inkhel hmasa zawkah kum 36-a upa Venus chuan Coco Vandeweghe lakah 6-7 (3-7), 6-2, 6-3 in hnehna a chang a, kum 2009 hnua major tournament final a khelh lehna hmasa ber tur a ni ang. Inkhel hnuhnung zawkah world number 2 Serena chuan Mirjana Lucic-Baroni 6-2, 6-1 in a hneh ve bawk.

Williams unaua naupang zawk Serena hian Grand Slam nomawi 22 a chawi tawh a, Australian Open bikah hian vawi ruk a champion tawh. A upa zawk Venus hian major title pasarih la tawhin Melbourne-ah hian a la hlawhtling lo a, final vawi khat lut ve tawhin a nau hi a ngam lo.

Hmeichhe singles khel zinga upa ber Venus chuan, "Serena inkhel hi a hmuhnawm ka ti a, a ball vuak dan leh a khingpuite a chhaih dan zawng zawng hi hmuh nuam ka ti. Final-a ka inhmachhawn tur hi ka duhthusam a ni," a ti. Venus hi Martina Navratilova tih lohah chuan kum 36 tlin tawh hnua Grand Slam final lut leh thei hmasa ber a ni.

Venus hneh tak kum 25-a upa Vandeweghe hian semifinal kalkawngah champion lai leh world number 1 ni bawk Angelique Kerber leh French Open champion Garbine Muguruza a hneh thei a, Venus lakah erawh set hmasa ber la mah se set hnuhnung pahnihah erawh a hnuaihnung zawkah a ṭang.