Real Madrid an tla
Copa del Rey semifinal-ah Real Madrid tan hmun a awm lo. Zinedine Zidane-a hote hian Nilaini zan khan Estadio Balaidos-ah Celta Vigo 2-2 in draw mah se Santiago Bernabeu-ah 2-1 a an chak tawh loh avangin Spain rama knockout football inelna ngaih hlutah beisei tur an nei tawh lo.
Real ṭhenawm club Atletico Madrid erawh Eibar nen 2-2 thoin inhnehtawk mah se Vicente Canderon-ah Diego Simeone hote hi 3-0 zetin an chak tawh a, harsatna nei loin semifinal an lut.
Real an vanduai!
Celta Vigo an mualah an huaisena a, attacking football hmuhnawm tak khelin goal chance pawh an ngah hle. Chutihrualin khawvel player ṭha ber (?) Cristiano Ronaldo-a'n goal la luh hauh hmain six yard box aṭangin goal ruakah a khung lo - Portugal captain leh Real an vanduai.
Portugal captain hian Isco ball vawrh ṭha bik chu crossbar tauh per nan a hmang a, ball per let chu awlsam taka khung theih tawh niin a lang a, mak takin Ronaldo hian goal ban pet per nan a hmang.
Real vanduaina belhchhah turin first half tawp hma hreta Celta forward John Guidetti ball pet chu keeper Kiko Casilla-a'n a dang nachungin ball per leh chu Danilo tan insaseng theih a ni tawh lo. Brazilian right back hian an lamah a tilut.
Celta an tlo
Second half-ah Real Madrid goal nawr a na a, Celta thawhrihmna leh Zidane-a naute finishing ṭhat tawk loh vangin goal a luh lawk lo.
Minute 62-naah Ronaldo-a'n freekick a pet thiam tih pholangin kawh zetin a pet goal a, Real-in beiseina thar nei mah se Portugal captain hian freekick a pet goal nawn tawh lo. Defender goal khung thei Sergio Ramos-a'n hnai tak aṭangin a tauh goal lo a, Karim Benzema-a'n danglamna a thlen thei lo bawk.
Celta an ṭang rei thei a, minute 85-naah mualneitu tlarhma lamin Real tlarhnung an ṭhiah hnuah Daniel Wass-a'n mawi zetin a khung. Semifinal lut turin Zidane-a hoten goal hnih an mamawh a, minute 90-naah Lucas Vazquez hmangin goal khat chhang let mah se goal dang khung belhna hun a awm tawh lo.
Tho chhuak tur Real?
Real Madrid-in match 40 hneh loh an tawn loh hnuah January thla tir lamah Sevilla an hneh lo. Tunah erawh match hnuhnung pangaah vawi khat chiah an chak. Real-in Luka Modric leh Marcelo te awm lo an tuar a, treble champion an inbeiseina chu a tawp phawt, Barcelona an chet ṭhat chhoh avangin nomawi dang hloh an duh loh chuan chetsual nawn a thiang tawh lo ang.
Real Madrid boss Zinedine Zidane chuan, "Tumahin chak loh an duh lo, tuna kan result avangin hnungtawlh kan tum lo - hma zawngin kan kal zel ang. Celta kan hmachhawn ang a, rilru huaisen leh chak duhna thinlung kan put chuan kan hmalam hun hi a êng a ni. La Liga leh Champions League nomawi kan chawi theihna chu a ni ta a, Copa del Rey theihngilhin inelna pahnihah hian kan ngaihtuahna zawng zawng kan seng tur a ni," tiin inelna lian zawk pahniha beisei an la neih thu a sawi.
Atletico an tlang
Atletico Madrid-in khualmualah Jose Maria Gimenez hmangin second half ṭantirhah hma an hruai a, semifinal lut tura Eibar goal mamawh zat chu goal nga a nichiah bawk. Mikhual team tan beisei tur a awm lo mah se subsitute pahnih Sergi Enrich leh Pedro Leon te goal hmangin second leg bika chak thei dinhmunah an ding hman a, amaherawhchu Atletico-in Juanfran hmangin an siphurh an sut.
Argentine manager Diego Simeone-a'n manager hna a thawh ṭantirh aṭangin Eibar a hneh ziah a, tun ṭum hi a hneh zawh loh vawi khatna a ni.
Thlirna Tawi
Copa Del Rey - Quarterfinal
Real Madrid Vs Celta Vigo
1st leg : Real 1 - 2 Celta
REA : Marcelo 69'
CEL : Iago Aspas 64'; Johny Castro 70'
2nd leg : Celta 2-2 Real
CEL : Danilo 44' (OG); Daniel Wass 85'
REA : Cristiano Ronaldo 62'; Lucas Vázquez 90'
Agg-ah Celta 4-3 in an chak
Atletico Madrid vs Eibar
1st leg : Atletico 3 - 0 Eibar
ATL : Antoine Griezmann 28'; Angel Correa 60'; Kevin Gameiro 68'
2nd leg : Eibar 2 - 2 Atletico
EIB : Sergi Enrich 73'; Pedro León 80'
ATL : Jose Maria Gimenez 49'; Juanfran 85'