Premier League: Engvangin nge inhliam an tam?

Premier League-ah inkhel chanchin a ngaihnawm tluk zetin player inhliam chanchinin ngaihven a hlawh. Ṭum dang zawng aiin player khel thei lo an tam a, result a thlak danglam avangin table thlengin nghawng a neia ngaih a ni.

Heti taka inhliam an tam hi engvangin nge tih zawhna a tam a, a chhan erawh a harsa lo - Covid-19 nghawng a tih theih. Kumina khelh tur European Championship chu nakkum atan sawn a ni a, nikum season a hun pangngaia zawh theih a nih loh avangin tun season ṭan hun a tlai.

Euro vangin tun season kal mek hi zawh tlai a thiang lo a, chutihrualin kum danga neih ṭhin inelna dang te neih nawn vek a ni. Community Shield leh League Cup thlengin khelh a ni a, international match lah a tam ngaia a tam tho avangin player-ten chawlhna hun a nei meuh lo - player ṭha bik an hah lehzual.

Website pakhat Premier Injuries zirchiannaa a lan danin tun season-ah tihrawl na 103 an awm tawh a, season liam ta khan game week riat khelh zawha inhliam aiin 16% in tun season-ah a tam zawk.

Arsenal leh England physio hlui Gary Lewin chuan club-in pre season an neih ṭhat loh vang leh an khelh zawn ngun vangah a puh. Lewin chuan, "Inkhelh zawhah ngai awhna hun kan neih loh chuan chauhna a rawn thleng a, chu chuan inhliam a hrin phah," tiin a sawi.

Harsatna belhchhah turin kuminah thlasik chawlh a awm dawn lo a, Covid-19 vangin tun season lak mek hi kum dang aiin kar ngain an zo hma dawn. 2019-20 Premier League season tawp leh  2020-21 season inṭan inkarah kar 12 chawlh tura ruahmanna chu hripui avangin kar sarihah tih tlem a ni a, hemi karah hian European Championship khelh a ni dawn.

FIFA-in fixture tawt vanga inhliam pumpelh nan substitution panga a duang a; La Liga, Serie A, Bundesliga leh Ligue 1-ah te hman a nih vek laiin Premier League-ah erawh substitution pathum hman a la ni.

Premier League chief executive Richard Masters chuan ṭum hnih club an rawn tawh a, substitution pathum ni tura thutlukna an siam avangin panga thlak theih a nih tawh a rin loh thu a sawi. Hetihlai hian Premier League hnuaia awm English Football League club 72 te chuan subsitution panga hman an thlang.

Premier League manager langsarten substitution panga an duh thu hi langsar takin an sawi tawh. Amaherawhchu league match kua khelh tawh chinah subsitution pathum an neih hi an hmang kim ṭhap em tih erawh zawhna a awm thung.

Arsenal, Newcastle, Spurs, West Brom leh Man United ten an match khelh tawh zawngah substitution an hmang kim vek. Hetih lai hian Man City manager Pep Guardiola erawhin match riatah match hnih chauh substitution hman vek a nei a, Liverpool manager Jurgen Klopp pawhin match kuaah vawi hnih a hmang kim lo bawk.

Arsenal:    Defensive midfielder Thomas Partey (malpui), left-back Bukayo Saka (khup) leh winger Willian (ti hrawl).

Aston Villa:    Midfielder Ross Barkley chu November 21-a Brighton an hneh loh ṭumin malpui hliam vangin minute ngana lekah an thlak.

Brighton:    Midfielder Adam Lallana chu November 21-a Aston Villa an hneh ṭumin ṭhal hliam vangin an thlak. 

Burnley:    Winger Robbie Brady chu November 22-a Crystal Palace nen an inkhelh ṭumin a malpui a ti hliam.

Chelsea:    Forward Christian Pulisic chu tun season-ah malpui hliam avangin league-ah vawi hnih chiah bul a la ṭan. 

Everton:    Captain Seamus Coleman chu a malpui hliam ngaiah a inhliam nawn avangin a chawl mek.

Leicester:    Defender Caglar Soyuncu leh Ricardo bakah midfielder Wilfred Ndidi leh Daniel Amartey te an chhawr thei lo.

Liverpool:    Defender pahnih Virgil van Dijk leh Joe Gomez te an khup zai a nih avangin tun season match tam zawk an chawl dawn. England left-back Trent Alexander-Arnold pawh chawn hliam vangin a chawl mek. Midfielder Naby Keita leh Xherdan Shaqiri te ti hrawl na vangin an chawl a, Jordan Henderson leh Thiago Alcantara te an la kir lo bawk.

Manchester City:    Striker Sergio Aguero-a'n match fitness a la nei lo. Defender Nathan Ake-a'n Netherlands tana a feh chhuahnaah malpui a ti hliam a, left-back Benjamin Mendy pawh ti hrawl na vangin a chawl mek.

Manchester United:    Defender Luke Shaw chu malpui hliam vangin thla khat chhung a chawl ang. 

Newcastle:    Striker Callum Wilson chu malpui hliam vangin a chawl. November 21-a Chelsea an hneh loh ṭumin defender Jamaal Lascalles a inhliam.

Southampton:    Striker Danny Ings-a'n match sarih aṭangin goal nga a khung a, khup hliam vangin kar ruk chhung a chawlh a ṭul dawn.

Tottenham:    Defender Toby Alderweireld chu November 21-a Manchester City an hneh ṭumin a ṭhalah hliam a nei a, a chawlh chen tur a la hriat loh.

West Ham:    Forward Michail Antonio chu malpui hliam vangin a chawl mek.